Un grito de revolta en un dizyerto de endjustisya
En mis rekuerdos de chikes, oyiya siempre avlar de "L’Affaire Dreyfus". Mi gramama kontava ke sus 3 ermanos en Paris, rikos antikaryos en el (Faubourg Saint-Honore) aviyan bivido esta trajediya, esta ola de antisemitizmo en Fransya. Los gritos de muerte a los Judyos, el procheso defamatorio del Kapitan Alfred Dreyfus i su degradasion publika en la korte de la Eskola Militar de Paris; komo le arazgaron sus dekorasiones, rompiendo su espada, arebashandolo i ensultandolo. Ma en esta eskrita vamos a avlar del destino de Emile Zola, Zola ke pago de su vida su amor de la djustisya. Rekapitularemos los faktos i diremos una vez mas verguensa a ti Fransia, paiz de los derechos umanos. Alfred Dreyfus era un ofisier Judyo en la armada Franseza a la fin del 19 siglo. En 1894, fue akuzado d’espionaje al profito de l’Almanya. Disheron ke remetyo rensenyamientos importantes a l’Ambasada Almana. Dreyfus deklaro ke no kometyo un akto asemejante; el era un militaryo atado a su Patria, la Fransia. Sus djuzgos lo kondanaron a vida en la izla del diable (Guyana) i en Enero 1895, lo degradaron publikamente malgrado sus protestasiones de su inosensya. I todo ampeso ansi. En Enero 1898, el ekrivano fransez, Emile Zola publiko en la gazeta l’Aurore una letra publika al Prezidente de Fransia kon el titro, YO AKUZO, akuzando a los djuzgos de Dreyfus del procheso sin bazas siguras. En Febrero, Zola fue akuzado de ser el inimigo de la nasion i de la armada Franseza, disheron ke se vendyo a los Judyos. Zola kon su famiya se fuyeron a la Ingletiera. Munchos miraron de matarlo i el peryo grande parte de su fortuna ma grasias al artikolo de Zola, en 1899 se izo un muevo procheso a Dreyfus ke fue demuevo topado pekador, ma esta vez el prezo abasho a 10 anyos. Kon una mueva desizyon, Dreyfus fue en partida pardonado i torno a su kaza i a su famiya. En 1902, Zola fue topado muerto en su kamareta en Paris i su mujer sin konosensya, eya kedo en vida ma el grande romansiero no salvo de su maldicho destino i se esparesyo a la edad de 62 anyos. Todos los egzamenes amostraron ke Zola muryo entosegado por el gaz ke entro por los buris ke kayentavan la kaza, la polisiya deklaro un aksidente. La muerte de Zola fue muy regretada por munchas personalidades del mundo entero ma en Fransa uvo grupos ke avyeron bokales de Shampanya tanto era sus inimistades kontra Dreyfus. En la seremoniya ande se transporto las sinizas de Zola al Pantheon, el jurnalisto, Luis Gregory travo enriva de Dreyfus i lo bleso livyano. En 1904, Dreyfus demando una mueva bushkidad de su procheso i fue deklarado enteramente limpyo de todo pekado. En1906, entro demuevo a la Armada Franseza, pujado de grado kon todas las onores militaryas. Alfred Dreyfus muryo en 1953 a la edad de 76 anyos. Anyos despues en 1953, un jurnalisto eskrivyo en el jurnal (Liberation) ke renkontro un farmasien ke konosiya al ke mato a Zola. Era un lavorador ke alimpyava los buris de gaz de la kaza de Zola antes su muerte en 1928. El konto a su primo komo aviya tapado los buris en lo ke estava lavorando enriva del tejado un diya antes de la muerte de Zola. Mas tadre uno de la polisiya ke izo bushkidad deklaro antes su muerte, ke la disparisyon de Zola era una verdadera matansina. L’Affaire Dreyfus i la muerte de Zola fue un shapitro eskuro de la istorya… Shapitro de ande nasyo, espunto una senteya de luz, en el empesijo de un kamino verso muestra Geula, verso la Tierra Santa de muestros abuelos kon un Lider (Herzl) ke konosemos todos i onoramos su Memorya.
