Komo de uzo, kero darvos una kurta enformasyon sovre un evenimiento istoriko ke paso en el mez koryente.
Savemos ke en el Yom Hashoah ke se komemora en el 27 Nisan (data a la Djudia) se yama en fakto Yom HaZikaron laShoah ve-laG'vurah, Dia de komemorasyon de las viktimas Djudias del Holokosto i del eroizmo de la rezistensya Djudia en el Ghetto de Varsovia. En fakto, esta data no tyene dar i aver kon una data spesyal de la revolta. Otruna koza importante, la komemorasyon en el 27 de Enero, se komemora todas las viktimas del Nazismo. Se trata de un shifro de 11 milyones, un shifro inkluyendo los 6 milyones de Djudios.
La revolta del Ghetto de Varsovia, famoza por su lucha de rezistensya de un mez de tyempo kontra las fuersas Almanas en Avril / Mayo de 1943, en realidad empeso kon una revolta inisyal el 18 de Enero de 1943.
Kuando los Almanes empesaron el proseso de likidasyon del Ghetto de Varsovia, una de las mas grandes konsantrasyones de Djudios en Polonya, syenes de miles de Djudios fueron yevados a Treblinka o a otros kampos de konsantrasyon. Aviya por seguro una chika rezistensya en el Ghetto, ma su kapasidad no era sufizyente para reushir a arondjarlos.
Kuando los Djudios realizaron la kuantidad de las deportasyones, kon un shifro serka de 5.000 rezidentes Djudios por dia, sus dezesperasyon se troko en sanya, una sanya ke les permityo a luchar, aunke no aviya una esperanza de ganar. La prinsipal organizasyon responsivle de la revolta del Ghetto de Varsovia fue la Organizasyon de Lucha Djudía (Żydowska Organizacja Bojowa; ZOB). La rezistensya inisyal del 18 de Enero de 1943 entervino kon las deportasyones durante tres dias, despues de los kuales se aretaron asta April. Despues de todo, lo mas importante era ke fue la primera vez ke los Almanes bivyeron una rezistensya serioza.
En este tyempo aviyan kedado solo 60.000 Djudíos en el Ghetto. (En el empesijo de la gerra este shifro era serka de 393.000). La ZOB utilizo el tyempo posterior al atako inisyal para aparejarse. Entrenaron kon todas las armas disponivles i fraguaron un sistem de bunkeres subterraneos ande los Djudios podian eskondersen.
El 19 de April de 1943, los Nazis empesaron de muevo la likidasyon del Ghetto i vyeron una dura rezistensya. Tomo kaji un mez a las fuersas de la SS i a la Wehrmacht para destruyir la armada (si se puede yamar ansi) de Djudios ke no teniya una eksperiyensa militara i luchavan kon unas armas non-poderozas. Ma parvinyeron a matar unos 300 soldados Almanes.
No fue asta kaji un mez despues, el 16 de Mayo de 1943, ke los Almanes finalmente deklararon eskapar la lucha i destruyeron la Grande Sinagoga komo simbolo de sus “viktorya”.
