El kinze de Shevat, Tu B’Shivat, se yama el Anyo Muevo de los arvoles. Tu B’Shivat es el dia ke selebramos una de las kreasiones del Dio - el arvole - i todo el bien ke resivimos de los arvoles. En este dia, se kome diferentes tipos de fruta, i apresiamos de ande vinieron. Esta fiesta se selebra en medio del mez de Shevat porke la majorita de las luvias de invierno ya eskapan en esta data, los arvoles empesan a espertarsen de sus esuenyo de invierno, i empesan a dar frutas. Un arvole ke enflorese antes de Tu B’Shivat es konsiderado komo un produkto del anyo pasado, ma si enflorese despues de Tu B’Shivat, es el produkto del anyo muevo.
Agora, egzaminaremos unos kuantos de los mesajes ke el ombre deve de tomar del arvole:
El arvole ke esta yeno de frutas en enverano, a poko a poko empesa a pedrer sus frutas, i sus ojas en otonyo. En invierno, parese ke ya esta muerto, entero dezmudo. En la primavera, empesa a reanimarse dando frutas muevas, i inchendose de ojas vedres. Komo la vida del arvole, la persona pasa sirkolos en la vida. Una perioda negra eskapa, una perioda buena empesa. Este sirkolo es parte de la natura del ombre. La persona no deve deziluzionarse. Kale ke sepa ke siempre muevas oportunidades se prezentan en la vida, i el ombre krese de muevo, le viene mueva enerjia para dar muevas frutas komo el arvole de la primavera.
Un otro mesaje emportante mos da el arvole. Si un arvole no resive la kantidad de agua ke tiene menester, i la enerjia del sol, se muere. El ombre es komo el arvole. Kon un buen mantenimiento, no es menester de empesar de muevo para kada objetivo ke keremos realizar. Para ir mas adelantre, puedemos fraguar enriva de los viejos temeles. Tenemos menester de un buen mantenimiento para tener mueva enerjia para kreser de muevo, i no tener dingun danyo spiritual. Devemos de protejarmos para pueder empesar a luchar, i kreser de muevo, sin tener menester de empesar de muevo del empesijo.
Un arvole tiene menester de ser plantado firmamente a la tierra. Akeya vez, mezmo el aire el mas fuerte no le puede azer dingun danyo, sino mezmo un aire chiko lo puede derrokar. La tierra no es solo la fuente ke abzorba el alimento, en mezmo tiempo provecha espasio para ke kreskan las raizes. Lo mezmo es por la persona; si una persona esta atada a su komunidad, i a su erensia, mezmo si todos los aires fuertes del mundo vienen, i miran a derrokarla, no la pueden meneyar de su lugar. La persona tiene menester de una baza, para pueder absorvar las valores i el moral. En un mundo yeno de negatividad, tenemos menester de un refujio seguro para pueder tornar, i arefreskarmos. El ombre deve de pasar estas valores a sus ijos por la kontinuasion de su erensia.
Otra koza ke mos ambezamos de los arvoles es la pasensia. Un arvole, ke empesa kon una planta chika, tiene menester de munchos anyos para ke kreska, ke se aga alto, i ke produska su fruta delisioza. Komo el arvole, tambien, i mozotros devemos de ser pasensiozos, i saver ke todas las kozas buenas, empesan a ‘dar fruta’ kon tiempo, siguro si estamos prontos a asperar.
