“Barbara Streisand” es una kompozitora amerikana, kantante, aktrisa, direktrisa, senarista i produktora. Tyene una boz fuerte i pasyonada. Es konosida tambyen por las kantikas romantikas ke kanta. Eya nasyo en el 24 avril 1942 en Brooklyn. Termino el liseo “Erasmus Hall”.
Kuando era chika se iva kon el granpapa a la sinagoga ortodoksa, i kontinuo a la eskola “Yeshiva of Brooklyn”. Estas eksperiensas la aparejaron al filmo “Yentl”. En 1983, Streisand, djugo en el filmo de “Isaac Bashevis Singer”: “Yentl,” i lo dediko a su padre.
Estava en el rolo de una ijika ke keriya estudyar en la yeshiva en la Polonya. Este filmo tuvo un grande sukseso.
Kuando teniya kinze mezes, peryo su padre i eya bivyo kon su granmama fina ocho anyos.
A 14 anyos, “Barbara” kuando vido en la shena el djugo de
“El Diaryo de Anne Frank”, kon sentimyentos de admirasyon i ambisyon, akel dia se metyo en tino ke i eya va djugar en la shena de Broadway.
En su livro deskrivyo akel dia kon las palavras: “Akel dia el djugo me fasino”… “Anne Frank teniya 14 anyos, i yo teniya 14 anyos. Eya era djudiya, i yo era djudiya. Deke no puedere djugar este rolo”?… Estava ekspresando sus sintimyentos kon estas palavras.
Su primera eksperyensya en la shena del teatro fue kon el komedyen djudyo “Joan Molinsky” porke estava en el mizmo ekipo.
Despues, tomo rolo komo una sekreter djudiya en un filmo i aya konosyo su primer marido “Elliott Gould”. Los dos fueron las estreyas de Hollywood i antes de 1970, tomaron la desizyon de divorsarsen.
“Barbara” lavoro en los dias de Broadway kon munchos kompozitores de kansyones, direktores i aranjores. En el anyo 1964, kon el muzikal de “Funny Girl” fue konosida en kada kaza en la Amerika. Este filmo izo ganar a Barbara el mijor “Oskar Feminino”. Eya djugo kon “Omar Sharif”. Aviya pasado muy poko tyempo de la gerra de sesh dias. La djente kritiko ke un ombre arabo komo Omar Sharif, se namoro de una mujer djudiya en Ejipto. En los jurnales uvo munchos komentaryos negativos.
Mizmo ke no termino la universita, Barbara tyene el titulo de doktora, dado de la parte de la universita de Brandeis en el anyo 1995.
Barbara empeso su karyera en el empisijo de los anyos 1960 en lavorando kon klubes diferentes en New York. Eya resivyo munchos premyos en su vida.
En 1973 Barbara Streisand fue muy reushida en el muzikal:
“The Way We Were” (Komo Eramos) komo aktrisa.
Ay 40 anyos ke esta kontinuando su karyera kon una reushita formidable en todos los espasyos de su arte.
