En serka vamos a fiestar la fiesta de Hanuka. Hanuka es la fiesta del mirakolo. En la istorya vimos i en la vida aktual vemos munchos mirakolos. La de Hanuka es una de estas.
Por egzemplo, los teretemblos ke tuvimos este anyo, vimos kuantas almas ke salvaron despues de kuantos diyas. Sin bever i sin komer, debasho de los betones. Eran verdadmente mirakolos.
Desparte de esto, la vida por si es un mirakolo. El korason ke bate, el funksyonamiento de muestro meoyo, las venas, los inyervos del puerpo i la armoniya del lavoro de todos estos organes endjuntos es el mas grande mirakolo en la vida.
Vos kontare una istoryika sovre este sujeto.
En Polonya antes un siglo, biviya una viejizika judiya kon su ija, su yerno i sus inyetos endjuntos. La ija i el yerno se ivan a lavorar i la viejizika se okupava de los inyetos. Antes un siglo en los kazales, los rabinos teniyan muncho respekto. Por todo lo ke keriyan azer o todo lo ke afitava, los konsultavan a los Rabis.
Kada diya antes ke los inyetizikos se vayan a la eskola, la viejizika les dava a komer por demanyana. Les metiya manteka kon dulse ensima de las revanadas de pan. Los ijikos komiyan i se ivan a la eskola.
Un diya en komiendo el ijiko, le kayo la revanada en basho. Ma la revanada kayo ensima la parte ke estava el pan i no el dulse. La viejizika disho “Ay esto es un mirakolo. Es un mirakolo porke kuando una revanada kaye en basho, siempre kaye de la parte ande se topa la manteka. Desde entonses ke no kayo por la parte del dulse, es ke es un mirakolo”. Kurto, los mando a los ijikos a la eskola i en derecho se vistyo i se fue al Rabi del kazal. Le konto lo ke afito. El Rabi se penso se penso i disho “Si esto ya es un mirakolo, no es un mirakolo grande ma es un mirakolo chiko. Tu vate agora i ven para diya de Jueves ke es diya de Sefer. Yo devo de pensar i te va dar la repuesta akel diya”.
I la viejizika se fue a su kaza i aspero kon grande merikiya, ke venga Jueves para tomar la repuesta.
Diya de Jueves se fue al Rabi, bateyo la puerta, entro i le demando si ya topo la kavza de este mirakolo.
El Rabi le disho “tantos diyas pensi i pensi i miri en los livros. I lo ke topi fue ke esto no es un mirakolo del todo. Es ke tu metites la manteka i el dulse a la parte yerrada del pan”.
En realidad los mirakolos pueden akonteser en todos los aspektos de muestras vidas. En vezes una chika koensidensya puede ser un grande mirakolo. Lo emportante es estar avierto a estos momentos i notar las ekstraordinaryas ermozuras de la vida. Mizmo una sonriza, una palavra de esperansa, un renkontro, o una ayuda puede ser un milagro. Lo emportante es valorizar estos momentos.
