Urim ve Tumim era un sistem profondo de topar la repuesta de problemes ke no se puediyan rezolver de una manera natural, era para el proprio del Kohen Agadol de aplikar este sistem deskonosido. Por otros miembros del puevlo, para entender los Urim ve Tumim, ampesaremos a avlar de la Keuma, grados de los Kohanim ke fue dado en primero a Aaron, ermano de Moshe Rabenu dezinyado por Ashem ansi ke a los ijos de Aaron, Eliezar, Itamar, Nadal i Abihu. Los Kohanim deviyan de vistir 4 vistidos ma el Kohen Agadol, shef spiritual de la Nasion, 8 diferentes vistimyentas komo los Kalsones, la Tiara, la Tunika, la Esharpa, el Pektoral (Hoshen), el Efod, el Palto i el Plato de oro. (En el plato aviya agranadas i chingirakes de los kualos uno se topo antes unos kuantos anyos en las bushkidas arkeolojikas.) Komo los sakrifisyos, los vistidos de los Kohanim teniyan un sembolizmo de pardonarse a los pekados ke puediya azer un umano en jeneral, por egzemplo, los Kalsones para el ensesto, la Esharpa para el rovo, el Plato de oro para la ensulta, el Esod para la idolatriya, el Palto para lashon ara, el Pektoral para el kamino kontra la injustisya. Avlaremos spesialmente del Hoshen, enriva del kual se topava 4 linyas dande enriva de kada una aviya piedras presiozas ke teniyan kada una el nombre de un Trivo de Israel. Piedras presiozas komo Rubis, Turkuaz, Safir, Jaste, Olix i otras. Se puede dizir ke el Kohen Agadol yevava en su Seno los 12 Trivos de Israel, en kurto yevava la totalidad de todos los Benei Israel. Aparte de no saver ke azer i topar una solusion de problemes de la komunidad, el Kohen Agadol arogava del fondo de su alma kon toda su fervor i santedad demandando de los sielos de las alturas spiritual la repuesta a su demanda ke viniya komo una maraviya mirakuloza. Unas kuantas piedras se rearelumbravan, esto se yama Urim, Luz. El Kohen adjustava las letras de las piedras ke embiyavan de manera apropriyada, i saliya la repuesta a la demanda a la arogatina; esto se yamava Tumim (kompletar). Este sistem mistiko ekstraordinaryo se apliko asta el anyo 70 de muestra era, asta muestra destruksion del Imperyo Romano el ampesijo de muestro Galut de 2000 mil anyos. En la sensya moderna se avla del poder de piedras presiozas; ya savemos ke kada objekto jeometriko, sovre todo la Piramida tyene rayones de luz; kada letra Ebraika tyene una forma jeometrika dande sale rayones de luz, ay unos kuantos anyos kon una metod provaron kon fotografia si no me yerro, es la metod de Kirlian. Dunke la Tora de mil anyos antes mos amostra los premisyos de la sensya aktual. Ke keremos u no una es verdad i la baza de todo siguro ke el Kohen Agadol deviya ser de muy alta valor spiritual para pueder ajustar de una manera djusta las letras del pektoral i sovre todo el poder alto de la rogativa, la Tefila la Kuvana total en el mesaje divino… En kavzo kontraryo saliya una repuesta non djusta, lo ke se vido en siertos epizodes de muestra istorya… Ke tengamos siempre mesajes de Pas i Amor de las alturas de los sielos. Espero vos aver dado un chiko apersivo de los Urim i Tumim.
