Se puede dizir ke mos fuimos a munchas sivdades i paizes. Kada vez me pasava del tino ke dainda no mos fuimos a los paizes vizinos komo Bulgarya o Romaniya. Me desidi de irme por un fin de semana por 2 -3 diyas. Di karar de ir a la kapital de Bulgarya, Sofya kon treno. En primero tomimos bilyetos de Sirkeci a Sofya. I tomi eformasyones de los livros i del internet. Ande puedemos kaminar, ver lugares interesantes turistikos. Kuando vino el diya de salir de Estanbol, partimos de Halkalı a las 10 de la noche. El kamino mos sureyo 8-9 oras. Un poko meldando livro, un poko komyendo i bevyendo, a las 12 mos echimos. A la demanyana komo 9, yegimos a Sofiya. Deshimos las validjas en la estasyon. En primero mos fuimos a un kafe para azer dezayuno. Aviya Burekes de ispanaka, de patata o sino de kezo. Estavan muy savrozos. Ya se save ke los burekes de los Balkanes son de chupar los dedos. Despues del dezayuno, de la estasyon tomimos el metro para irmos a Serdika ke es el sentro de Sofya. Aki aviya Central Sofiya Market Hall. Kaminimos aryento, ande aviya botikas turistikas i kafes diferentes. Enfrente de este lugar aviya el AVM ke se yama Tzum. Miraremos i saliremos dishimos, ke echo tenemos en AVM. Ya tenemos bastante en Estanbol. En entrando de la puerta grande, ke no mos salga enfrente una restorante Kasher, ke se yama Jerusalem Kosher Restorant. Desidimos de vinir al otro diya para komer. De ayi en kaminando pasimos de la kaye Vitosha, ke es serrado al trafiko para los otos. En el kamino, vimos la statua de St. Sofiya. 22 metros de altura, ke le dio el nombre a la sivdad Sofya. Mas de esto en el kamino vimos la Iglesiya St.Petka ke es Iglesiya Ortodoksa, i el Palacio de Justecia. De aki vinimos a la kaye Vitosha. Es una kaye komo (Istiklal caddesi), yena de botikas, restorantes i kafes. Mos asentimos en un restorante Italyano. Bushkimos ama no aviya restorante spesiyal Bulgara para komer. Ya estava kaji 2 i mos fuimos a tomar las validjas para irmos al Airbnb ke alkilimos, en la punta de la kaye Vitosha, ke lo bueno miyo. El primer diya kaminimos avagar avagar para konoser por aki por aya. El aver estava maraviyozo.
Sigundo diya de la manyana empesimos el program de kaminar. Teniyamos munchos lugares de ver. En primero kon metro mos fuimos a la Universitad de Sofya. De aya pasando de la guerta grande vinimos a la Katedral Alexandre Nevsky, una Katedral muy grande i mostroza. 10.000 personas endjuntos pueden azer orasyones. De aya pasimos por el Edifisio del Parlamento, Biblioteka National, la Bazilika de St. Sofiya, Iglesiya Rusia, Galeria de Arte Nasional, Residensia del presidente, en el patio de aki aviya la Rotunda de St. George. De aki pasimos de muevo a la Sinagoga de Sofya. Enfrente de la Sinagoga aviya la meshkita, Banyanbaşı cami. El arkitekto es “Mimar Sinan”. Los lugares ke eskrivi keriya kontarvos kon detayes ma los artikolos del Şalom deven de ser kurtos. Por esto en kurto vos eksplikare Sofya. La lokanta Kasher estava muy buena. Komimos Shuarma, Shinitsel i salatas komo Israel. La Gastronomiya Bulgariya es mizmo komo los Balkanes. Burekes, koftes, kezo de kashkaval se nombra aki muncho.
