Israel esta pasando dias areskuros. Hamas en el 07.10.2023 Shabat demanyana ke era el dia grande de orasyon Simha Tora, izo un atako muy grande kontra Israel. Los militantes de Hamas entraron por Gazza i mataron syenes de personas i tomaron munchos rehenesjiIsrael no se estava asperando a un atako tanto grande i dyo una repuesta sangriente. Esta tansyon se konvertyo en una gerra entre Israel i los palestinyanos.
Hamas kere fondar una republika islamika en las tyerras okupadas por Israel. Israel kon Ejipto serraron endjuntos todos los kaminos para ir a Gazza. Iran esta dando un grande apoyo a Hamas, finansalamente i militaramente.
Gazza es un lugar emportante ande biven dos milyones de personas. El un milyon ke bive en Gazza, tyene menester de ayuda alimentarya.
Israel esta gerreando en las kuatro partes del paiz. Israel ke esta azyendo atakes aereos kontra Gazza, tambyen afirmo ke estava planeando una operasyon terrestra aki.
Deke la rejyon de Gazza es una rejyon emportante?
Gazza es una sivdad entre Israel i Egypto i la mar Mediterranea ke tyene 41 kilometros de largor i 10 kilometros de anchor ande mora un puevlo muchedumbre. Israel no esta deshando entrar los kamyones yenos de alimentos a Gazza.
El prezidente de la Alemanya “Scholz”, disho ke “Erdoğan” puede djugar un rolo muy emportante komo medyator, i a parte el prezidente de Ejipto kon Katar deven de entervenir para pueder diminuar la tansyon entre Hamas i Israel.
“Scholz” el presidente de la Alemanya, izo una avla en el parlamento federal sovre el sujeto del konflikto enre Hamas i Israel, por los innosentes ke se estan muryendo en esta gerra. El yamo a todos ke se topan en esta rejyon, para evitar las aksyones muevas hostiles en dizyendo: “Muestro mesaje esta klaro ke atakar a Israel sera una error impardonable”.
Estamos en el onzen dia de esta gerra. La trajediya ke se esta bivyendo en Gazza se esta engrandesyendo de dia en dia. Ya se izo un akordo para la avyertura de la puerta “Refah”, ke se topa en la frontyera en el kontrol de Ejipto. Para pueder ayudar a los ke tyenen menester de komer i de todo lo ke se nesesita para bivir, esta puerta se va avrir. Munchos fonksyonaryos identifikaron ke la primera ofensiva de Hamas, el atako a Israel parese, al atako ke fue el 11.9 a las torres jumelas en New York. Este atako vino djusto al 50. Anyo de la gerra ke fue en 1973 entre arabos i israelyanos.
Mizmo ke Turkiya es un paiz muzulmano, es el primer paiz muzulmano ke konosyo a Israel. La Amerika i munchos paizes de la Evropa estan al lado de Israel i estan dando apoyo seya militar, seya monetaryo.
Israel se esta aparejando a azer una operasyon terrestra a Gazza, para pueder destruir la organizasyon de Hamas i para pueder salvar los prizonaryos.
Malorozamente no va aver un ganador en esta gerra, mas ke la muerte de los inosentes, i el puevlo sivil de dos partes. Pekado!...
Espero ke todo se va terminar kon trankilita i kon akordo.
El Dyo ke de pasensya i rezistensya a los ke estan bivyendo en esta rejyon.
