Ya savemos ke kada anyo en los mezes de septembre i oktobre fiestamos kaji la mas grande partida de las fiestas Djudias. Noche de Shabat era el empesijo de Sukot. I diya de Shabat, muestros amigos mos envitaron a la Sinagoga de Ortaköy porke estavan ofresiendo la Seuda de Shabat en la onor de sus inyetas ke nasyeron en los Estados Unidos, en Nueva York.
Komo las sinagogas no estavan bastante yenas en Rosh Ashana i Kipur, estava siguro ke muy poka djente devian de partisipar a esta orasyon. Ma no fue este modo. En la seuda ke se realizo en la Suka avia kreo bastante yahides.
No se kuantas personas vyenen a las sinagogas kada shabat, ma diya de Rosh Ashana mas de mil personas vyenen a la orasion. Es djusto ke ay munchas sinagogas: En Şişli, en Caddebostan; en la Büyükada, en Ortaköy; en el Neve Shalom; en Göktürk; en Yeniköy; en Balat; en Hasköy; en la Sinagoga Ashkenaz; en la Sinagoga de los Frankos, en Kuzguncuk, en la izla de Burgaz, en el Barınyurt/Oryom; la Sinagoga Hemdat Israel en Yeldeğirmeni/Haydarpaşa; en Sirkeci. Este anyo no estava avyerta, ma tenemos i la Sinagoga en la isla de Heybeliada. Kreo ke la Sinagoga de Çorapçı Han no fonksyona para las Fiestas de Roshashana i Kipur.
Ke rikeza de sinagogas para 15.000 almas. I de diya en diya es mas difisil de topar hazanes ke melden la perasha. Estas son las sinagogas. Ma en Ortaköy se aze dos orasyones diferentes; es la mizma koza para Şişli ande la sigunda orasion se realiza en el midrash de la Talmud Tora.
Para el shofar de vez en kuando ay difikultades para topar bastantes tokeas.
Kreo ke en unos kuantos anyos vamos a tener mas manko sinagogas ke fonksyonan…
Hag Sukot Sameah.
