El otonyo mos traye el entuzyazmo, la egzaltasyon de bivir, porke es la sezon de todas las fyestas emportantes, komo “Rosh-Ashana” ke es el empesijo del anyo muevo, “Kipur” ke es el dia de pardon i “Sukot” ke es la alegriya i el agradesimyento al Dio. El otonyo es una sezon del anyo ke marka la transizyon entre el enverano i el invyerno. Para los animales es la epoka de las emigrasyones, es una sezon melankolika, las ojas de los arvoles empesan a kayersen, mizmo la kolor troka de vedre a amariyo. El sol se amingua, la temperatura troka, las luvyas empesan i la djente kere mas presto tornar a su kaza sin ke se aga areskuro.
El otonyo es una epoka perfekta, para refleksyonar sovre todos los trokamyentos en muestro dorredor. Es una epoka de transformasyon, la tyerra se deskansa para enfloreser muevamente en la primavera. En el otonyo, la fonksyon metabolika se ralentiza, kaye la enerjiya de la persona, tenemos menester de mas munchas kalorias. Las enfeksyones empesan, la umidita puja, las oras de luz se akurtan. Esto todo provoka una diminusyon de la enerjiya de la persona.
Por otro lado, el otonyo tambyen aze referensya a una epoka de la vida de las personas, el kamino verso la vejez. La perioda de la vida umana ke se esta deklinando verso la vejez.
El otonyo en una persona se asosya a la melankoliya, mos retiramos del mundo eksteryor fizikamente i psikolojikamente i mos aboltamos a muestro interior.
Estamos mas muncho en kaza, meldamos livros, konversamos i mos enstruimos en el komputador.
Es una sezon muy luvyoza. Kon la luvya, sintimos en la tyerra muevas golores.
Kuando es el otonyo de la vida? Si ayegimos a 65 anyos, edad ke pensavamos ke era muy leshos, muestra vida troka enteramente. Muestras responsabilidades son otras, muestro puerpo es diferente. Las personas se syenten mas kansos, no se pueden konsentrar muncho i tyenen difikultades, problemes de esfuenyo.
En esta sezon se ve en las personas la anksyedad, la reduksyon de la aktivita fizika, trokamyento en el pezo, el pesimizmo i otras kozas.
Asigun “Paulo Coelho”, no ay mijor momento ke el otonyo para empesar a olvidar las kozas ke mos inyervan. Desharlas komo las ojas sekas, pensar a baylar, profitar de kada momento del sol, ke syempre mos kayenta, kayentar el puerpo i repozar un poko. El otonyo de muestra egzistensya despues de aver kompletado una vida kanseryoza kon muncho lavoro, kon relasyones sosyales bivido kon todas sus konsekuensyas, los problemes del siklo familyal es la rikeza del umano. La vejes mos invita a mirar a muestro interyor para deskuvrir el trezoro de muestros rekuerdos i muestra rikeza interyor kon munchas experiensas. Envejeser no depende solamente del individuo, ma el entorno sosyal, los amigos, todos tyenen una grande influensa sovre esto.
Yo penso ke, todas las periodas de la vida son emportantes i kale bivirlas de una manera yena i util, komo okuparse de las inyetas, inyetos, djugar kon eyos, yevarlos a un teatro u byen a un parko, kontarles istoryas, avlarles en una lingua etranjera para ke se ambezen una sigunda lingua. Esto todo es una grande okupasyon, relaksa i da una grande satisfaksyon a los grandes.
