El pintor Edvard Munch nasyo el 12 disembre 1863 en Loten, i muryo el 23 janvie 1944. La famiya de Munch bivyo en Oslo, Norvejya. Su madre muryo muy manseva a la edad de 30 anyos. Era de natura frajil i paso tuberkuloz, ke era una hazinura muy importante i difísil de kurar en akeyos tiempos.
Fue engrandesido por su tia ke komo era muy talentuoza en el kampo de artes, deskuvriyo muy presto los aptitudes por la pintura de Edvardo. Prada, su ermana grande se muere de la mizma hazinura. El pintor produse varias ovras sovre este tema de la muerte i hazinura. En el anyo 1881, Edvard entra a la eskola de pintura. En los anyos ke sigen, Munch vijita Paris i se enamora de las ovras de Manet i de los impresionistas. A su retorno a Norvejya, el lavora oras i oras en su ovra "el chiko hazino". Tiene relasyones adultaryas i esto le provoka krizas nerviozas.
En 1886/90 Munch sufriyo muncho de las trajediyas ke pasaron en su famiya. Su madre, komo su ermana muryeron muy mansevas i la mankura de sus familyares le kavzaron instabilidad mental. Edvard Munch pensava ke sus familiares eran maldisyonados. Munchas versyones de sus ovras fueron vendidas en litografiyas. Munch después de pasar un kolapso nerviyozo i ser atakado de una paraliziya de un lado de su puerpo entro a un sanatoryom ande gano su salud i sus ovras
tomaron una vizyon mas pozitiva kon sujetos komo payizajes i ovreros. Varyas de sus ovras fueron rovadas i mas después rekuperadas, kaji sin ser danyadas. Sus ovras fueron vendidas por milyones de dólares i mostraron ekspresyones universales sinseras de la umanidad.
Kreyo ke en momentos dolorozos de stress, de haberes de guerras i atrosidades ke se biven en el mundo, el ‘Grito’ de la pintura de Munch es lo mas ekspresivo possible. Oguramos al mundo Mankura de Gritos i lo Muncho de artistas komo Edvard Munch.
