Ke kuryozo ke es la entradura de la anyada mueva en los Djudyos. Al kavo de Disembre, munchos en resiviendo el anyo muevo en felisitando este akto empesan a bever fin a ke se azen borrachos. Al dia sigiente no se troka nada, solo los problemes se adjuntan a otro problem ke es la dolor de kavesa. I las personas deklaran el anyo muevo. Mozotros tambien bevemos vino en Rosh Ashana ma para santifikar a el dia ke meldamos el Kidush.
Djustamente en la fiesta de Rosh Ashana komemos komidas tradisionales en muestras kazas komo una fiesta. Mos vistimos vistidos ermozos para resivir la anyada mueva. En este dia estamos alegres ma tenemos un poko de espanto porke se aserka el tiempo de el djuzgo.
Esto empesa kaji un mez antes. El el mez de Elul, empesamos a orasyonar, rogar i azer aktos de byenfezensya. Esto es konoser muestros pekados i delitos antes de el dia de el djuzgo. Las puertas de Teshuva estan avyertas i el Todo Poderozo esta esperando a los Djudyos para resivir sus orasyones. Komo esta eskrito en los Selihot:
“Padre piadozo! Avre los sielos para oyir muestras orasyones.”
Ke ermozo ke es antes un mez de el dia de djuzgo auguramos a muestros keridos “Leshana tova tikatev vetehatem – eskritos i siados para un anyo muevo.” En este dia no estamos estrechos o tristes. Estamos yenos de esperansa i temor de el Dio. Perkuramos para entrar de las puertas de piadades ke estan aviertas komo esta eskrito en el “piyut” de “et shaare ratson.”
“Es tiempo ke las puertas de piadades esten aviertas.”
En este dia el Todo Poderozo djuzgó a la primera persona i lo perdonó. Estamos kaji siguros de estar eskritos i siados en los livros de vidas largas i buenas. La boz de el Shofar mos eksklama el futuro bueno ke mos esta asperando.
Kon estos pensamyentos buenos kero suetar una anyada buena, klara, yena de prosperidad, kon salud, kon ganansya, kon pas en el mundo i en la tierra santa de Yisrael, amen.
Shabat Shalom.
Tizku Leshanim Rabot neimot ve tovot.
