"Esperamos ke este sentro va garantizar un futuro largo para la vida i la toleransia judia en Alemanya”, disho a CNN el rabino berlines Yehuda Teichtal.
El sentro de 8.000 metros i de siete etajes va ser un “lugar de enkontro entre relijiones i edades”. El sentro fue konstruido teniendo en kuento tres prensipios: edukasion, spor i kultura, i va estar avierto para todos: eskolas kon una maestra, un sinema i un djimnazio. En el eksterior, ay una pared dekorada kon grafitis del arshitekto i artisto Tobias Friesike. “Va ser una kaza avierta a todos. Va aver eventos kulturales, estudio de muzika o de arte, filmos. El ke kere va pueder asistir a un evento, a una lektura de un livro, o a un programa edukativo” disho Teichtal a CNN.
La entrada, komo el fachada del edifisio, va ser dekorada kon una kolor sinyifikativa al judaizmo: blu. "El blu traye al tino el sielo, i en el judaizmo blu reprezenta Israel", disho Teichtal. Teichtal, nasido en los Estados Unidos, disho ke este sentro era la vizion ke él tuvo kuando vino por la primera vez a Berlín antes 27 anyos. Kuando lo konosio a Tchoban antes unos kuantos anyos, le konto al arshitekto su iluzion de azer un sentro edukativo judio. Imediatamente, el dekorator empeso a desinar. “Kale ke mos topemos para desidar komo de sentro keremos krear. Todos tenemos la responsabilidad unos de otros, todos azemos parte de la sosiedad i todos tenemos menester los unos de los otros. Devemos de krear un sentro perfekto”, disho Teichtal.
Komo munchos judios, la relasion de Teichtal kon Alemanya no fue buena. Teichtal se engrandesio en Brooklyn. Mas de 60 de los miembros de su famiya fueron asesinados en el Olokosto. Ma, el esta diziendo ke Alemanya troko muncho, i tiene munchas enstitusiones judias. "Este sentro es una mueva etapa de los 1.700 anyos de la istoria de la vida judia en Alemanya", disho Teichtal. Teichtal esta esperando ke este sentro va ayudar a trokar el komporto negativo entre los judios en Alemanya, i se va formar un komporto de “toleransia, amor, respekto i de partaje".
Josef Schuster, prezidente del Konsejo Sentral de Judios en Alemanya, mensyono la importansa del sentro, diziendo ke es "un simbolo para el futuro de la vida judia, de las famiyas judias aki en Alemanya". “Es parte de la tradision de la fidelidad de dekadas de organizasiones judías i, sovre todo, de las komunidades judias en Alemanya, de avrir el kamino para las famiyas i las kreaturas judias en este paiz”, disho a CNN.
Si dainda egziste espanto del antisemitizmo en Alemanya, el sentro esta adoptando una prekosion de seguridad diferente de munchas otras enstitusiones judias. Teichtal disho ke el sentro tiene reshas de vidro a su alrededor, ke lo esta konektando kon la sinagoga i el sentro de la komunidad ke esta aya durante anyos. “Tenemos las prekosiones de seguridad nesesarias. En mezmo tiempo, kijimos azerlo de una manera transparente i avierto”, disho a CNN.
Teichtal disho ke el sigiente projekto va ser anchear la sinagoga, ke van a fraguar en la propriedad de al lado.
