Es la fin de semana pasada kuando en la Büyükada, en el sentro kultural Çelik Gülersoy ke se topa serka de la Plasa Çınar, ke se realizo las aktividades sovre los eskrivanos de las Izlas, los ke eskriven sovre las izlas. Durante este evenimyento se vendyo los livros de mas de 80 eskrivanos ke biven en las izlas. Kreo ke las izlas son bastante produktivos para los eskrivanos. Durante i dospues de la kriza de la Corona, mas muncha djente i munchos intelektuales se enstalaron en las izlas.
Diya de Shabat avia dos sedutas. En la primera es el sinyor Halim Bulutoğlu ke modero una avla kon Viktor Albukrek, Ahmet Tanrıverdi ke es konosido komo Fıstık Ahmet, Robert Schild de Burgaz i Adil Bali ke esta eskrivyendo munchos livros sovre Estanbol i las izlas para las Edisyones de la Munisipalitad d’Estanbol. Todos kontaron lo ke eskrivyeron i sovre lo ke pensan de eskrivir en el futuro. Es dospues ke topo lugar la entrevista kon Yakup Barokas ke eskrivyo un livro sovre su chikes i su manseves en la Büyükada entre los anyos 1951-1971. Yo fui el moderator de esta seduta. Envitimos al Sinyor Nino Varon, ke es amigo kon Barokas i ke eskrivio la prefasa del livro. Reelmente mos kontaron syertos evenimyentos muy enteresantes sovre lo ke bivyeron en la Ada.
Yakup Barokas firmo su livro despues para los ke kijeron.
Diya de Alhad muestro amigo, Alberto Modiano prezento su livro sovre la Eskola Relijioza Grega ke se topa en la izla Heybeli. Alberto realizo un livro muy reushido kon fotos. Se kedo una semana entera en esta eskola ke no fonksyona oy en diya ma ke es avyerta sin dando edukasion porke no es permetido. Devo de felisitar a muestro amigo Modiano por su lavoro. El livro es en turko i en inglez.
El diya dalkavo, Ahmet Ümit, un eskrivano famozo ke eskrive romansos polisyes sovre krimen avlo al publiko ke vinieron a sintirlo. Es dospues de kada konferensia ke los eskrivanos firmaron sus livros.
