La muzika ya se save ke traye a los puevlos lado kon lado. Todo modo de kultura del mundo kantan i baylan endjuntos. Endjuntos se emosyonan, endjuntos se alegran, endjuntos yoran, kuando oyen una kantika. Por esto si no savemos ni la ligua, ni la kultura, la muzika mos traye a todos lado kon lado kon la djente.
En el mundo ay sivdades spesyales ke se konosen kon sus muzikas i bayles. Por egzemplo, kuando oyimos un TANGO mos viene al tino Argentina i el enstrumento, BANDONEON. En Meksiko, tanyan los tanyadores la Gitara i Trompeta el MARIACHI. Los Rusos baylan la Polka kon el enstrumento ke se yama BALALAYKA. En la Gresya kuando empesan a tanyer el Buzuki, el mundo entero bayla SİRTAKİ. Ya vos konto en un otro artikolo las muzikas i bayles i enstrumentos de otros puevlos. Oy vos kero kontar sovre el bayle SİRTAKİ kon el enstrumento Buzuki porke me gusta oyer la muzika Grega.
Buzuki es komo el Baglama Turko. Kuando se fueron los Gregos de la Turkiya, se yevaron al lado el Baglama. El governo Grego no desho ke tanyen el Baglama para no akodrarsen de la Turkiya. I ansi izyeron los Gregos ke se fueron de la Turkiya el Buzuki, ke parese a la boz del Baglama. I kon este enstrumento empesaron a baylar el Kasap Havası i el Halay de los Turkos. Este bayle se nombro Kasapiko. Komo este bayle i muzika, salyo el Sirtaki komo el Zeybek de los Turkos.
El mundo konosyo mas muncho al Sirtaki porke en el anyo 1964, Anthony Quinn djugo en el filmo romantiko, ZORBA ke eskrivyo Nikos Kazancakis. La muzika la izo Mikis Teodorakis. En los anyos 1970, los kantadores, George Moustaki, Nana Mouskouri i Demis Rousos izyeron kantikas kon el akompanyamiento del Buzuki. Estas melodias oy en diya me plazen muncho sintirlas de George Dallaras, Haris Aleksiou, Anna Visi i Glykeria.
Si vos plaze sintir kantikas Gregas kon Buzuki, vos puedo eskrivir unos kuantos titros de kantikas: Anna Visi "Pshedelia", Yorgo Dalaras "S'Agapo", Haris Aleksiou "Mia pista apo fosforo i en fin de Glikeriya "Tha Spaso Koupes". En Turkiya oy en dia esta muzika mos kanta el kantador Fedon. Un diya si el kamino vos yeva a la Gresya, asentá en una Taverna i dizilde al garson ke vos trayga salata Grega, Tzaziki, Saganaki i Pabuchakis kon Uzo para bever i en oyendo la boz del Buzuki, alevantá i baylá el Sirtaki. Yassuuuu...
