Munchos estudyos se realizan para desidar kualos son los paizes los mas edukados del mundo. OCDE izo una lista de estos paizes despues ke se dió la desizion final.
Segun estos estudyos, las diez nasiones las mas edukadas son: Kanada, Japon, Israel, Korea, Inglatierra, los Estados Unidos, Australya, Finlandya, Noruega, Luksemburg.
En jeneral, la edukasyon djuga un grande rolo en el developamiento sosyal, umano, i ekonomiko. La edukasyon puede ogmantar la igualdad de jenero, aminguar el matrimonio infantil, asigurar la pas, i en jeneral ogmantar las posibilidades de tener una vida saludoza. La edukasyon es un derecho umano ke da a kada persona mas munchas oportunidades en la vida, komo oportunidades de empleyo, mijor salud i la kapasidad de partisipar al proseso politiko i sosial.
Komo puede la edukasyon ayudar al progreso de un paiz?
La edukasyon es muy importante para ke un paiz se prospere. Las personas edukadas son konsientes del estado sosyoekonomiko del paiz, i pueden ayudar a su progreso. La persona edukada ya save komo kontribuir al bienestar del paiz, por egzemplo, tomar un otobus para ir al echo al lugar de ir kon otomobil. Una de las razones de su konsiensya es porke ya le ambezaron estas valores en la eskola.
La persona edukada save a ken votar para ke se realize una diferensia pozitiva en la ekonomia de su paiz.
La edukasyon ayuda a eskojer lavoro: eskojer un lavoro para ganar mas muncho i progresar. A los graduados universitarios se les paga mas muncho ke a los ke no tienen un titro universitario.
Si en un paiz ay munchos sivdadanos sin empleyo, esto es un obstaklo para el progreso del estado ekonomiko i del developamiento del paiz.
La edukasyon ayuda a las madres solas. Las madres solas ke no tienen edukasyon no pueden obtener un lavoro bueno para mantener sus ijos. La edukasion puede ayudar a las madres solas a engrandeser sus ijos mijor, a edukarlos, i ayudarles en todo modo de koza, i a ambezarles a ser sivdadanos responsavles del paiz.
La edukasyon ayuda a aminguar la provedad de un paiz.
Si un paiz kere asigurarse ke ayga igualidad de oportunidades para todos, independente de su rasa, jenero o klasa sosial, es nesesario ke ayga igualdad de edukasion para todos.
La edukasion diminua la violensia de jenero. En munchos paizes, la violensia de jenero es un obstaklo al derecho de edukasion de las ijikas. Los apadres ke no tienen edukasion no embiyan sus ijas a la eskola, i las forsan a kazarsen a una edad muy chika. Si un puevlo es edukado, esto les ayuda a trokar la mentalidad del paiz, i a aminguar la violensia.
La edukasion ayuda a aminguar el porsantaje de mortaldad de las personas. Las personas se miran mijor, i biven mas munchos anyos, i el governo tiene kudyado de la sanedad de sus sivdadanos i les ofrese mas buena atansion medikal.
