Los Djudyos de Gaziantep tambien son Sefaradis. Kuando se fuyeron de la engizisyon de Espanya kon las barkas vinyeron a las tierras Otomanas, ke es agora Libano i Siria. I despues, en los anyos 1911-1920, pasaron a las tierras de Turkiya, a Gaziantep. Akel tiempo eran 2.000-3.000 personas ke arivaron a Antep. En la primera gerra mundial, Antep fue okupada por los Fransezes. Los Djudios se izyeron a la una kon la komunidad de İttihat ve Terakki i gerreyaron kontra los Fransezes. Despues de la gerra, los Djudyos lavoraron en komersio. Akeyos tiempos teniyan en Antep, Sinagogas, Hazanim, shohetes i tambien Rabis. Solamente Moel no tenian i kuando teniyan de menester yamavan de Estanbol. En la sigunda gerra mundial, la Sinagoga la ivan a tomar de la mano de los Djudyos ma el komandante, Mareshal Fevzi Çakmak no los desho i les dyeron atras a los Djudyos para ke agan orasyon. Despues de los anyos 1960, ampesaron a vinir de G.antep a Estanbol para bivir. Las famiyas ke vinyeron de G.antep eran, Kohen, Levi, Franko. Despues del anyo 1936, ke salyo la ley de tomar alkunya, se trokaron las alkunyas komo Arkadash, Ases, Bilmen, Bildirici, Dushi, Lord, Naftali, Nihmet, Özsezikli, Selami, Shasho i Tavashi. Agora vos kontare un poko sovre la Gastronomia de los Djudyos de Gaziantep. Son muy rikas i savrozas las komidas de esta jeografia. Unas kuantas komidas vos eskrivere.
Muhammara: Kaji en el diya pueden komer kada vez este meze ke se apareja kon salsa de tomat, muez, ajo, azete de oliva, pan bayat, kimyon i sharope de granada.
Mehshi: Reyeno Miksto. Se apareja kon las verduras sekas.
Mehshi Kusa: Las kalavasas se inchen kon sarsicha
Seliye: Es una komida ke se aze kon pazi
Beyet: Es una komida ke se aze kon la kostiya de kodrero ke se inche aryento kon arroz.
Sembusek: Es Empanadas ke se apareja kon karne o sarsicha.
Hamod: En mirando parese una supa de verduras, i se kome endjuntos ensima del arroz.
Estas komidas i mezes son las espesyalites de los Djudyos Arabos. Kada Shabat o las noches de mued me kontaron ke meten en la meza diferentes salatas, humus, salata de berendjena, salata de patatas i la spesyalite de los Arabos, ichli kyofte. A kada meza kaliya ke traiygan Iccee, despues Mehshi Kusa i en fin el arroz ke komiyan kon Hamod.
Mas de esto kada mued aparejavan dulses spesyales por egzemplo, Baklavas, Kadayifes, Künefes i Sütlaches.
