El biervo DEGEL ke se empleya oy en ivrit para bandiera. En el termino de la Tora kere dizir una formasyon militarya. Kuando los Benei Israel kantavan en el diziyerto al torno del Mishkan en kare, en kada vanda aviya tres trivios donde el uno era Lider. Kada trivio teniya un sinyo (ot) sus kolores eran las mizmas ke se topavan ensima del busto (pecho) del Kohen a Gadol. Yehuda, blu klaro kon un leon: Efraim, preto kon un toro: Reuven, kolorado kon un mandragor (una yerva ke krese en el tiempo del trigo, ke tomavan los ke no puediyan parir): i Dan kon una kulevra.
Estos semboles son atados a las palavras de bendisyon de Yaakov a sus ijos antes de su muerte, ya savemos ke Yehuda fue el primo lider del trivio real de donde vino David Ameleh. Agora responderemos a la demanda ke mos enteresa, komo se yamava la bandiera en la Tora? La bandiera se yamava Nes. Porke es atada a uno de los mirakulos ke uvo en el dizierto i komo una repuesta a los pekados ke izieron de vez en kuando los ijos de Israel. Nes keriya dizir tanbien “el palo de la bandiera Hanta”, el palo ke yevavan los grupos militaryos en sus gerras. El biervo Nes es atado a un evenimyento ke se paso en el dizierto, kulevras de fuego atakaron i firieron de negra manera a los ebreos. Para kurarsen de esta yaga Moshe les ordono de meter enriva de un lugar alto un palo kon una kulevra de kovre enriva, todos los ke miravan ariva se sanavan de sus yagas. Entenderemos siguro ke mirar ariva es alevantar los ojos i demandar piyadad del Santo Bendicho El. Kovre es una matiera ke sana las morsuras de las kulevras. Adjustare Maha (Kulevra) i kovre (nehoshet) tienen la mizma rasina. La istorya de la bandiera ampesa aki i pasa por munchas etapas antes de arivar a la bandiera de oy ke konosemos todos.
En muestra istorya dos siglos antes de AJ, en la revolta de los judios kontra el imperio grego, la bandiera ke alevantaron los Makabis era blanka kon los biervos ke amostra la kreensya en el Dio. (Mi Kamoha Baeli Ashem = Ken komo A ti Sinyor Dio).
En la epoka Medieval, despues AJ, todos los puevlos i komunidades teniyan bandieras de kolores ermozas i los judios eran muy tristes de no posedar sus amblemas.
En 1354, el Emperor Charles IV dyo el permiso a los Judios de tener una bandiera de seda kolorada kon un magen David ke fue el tema de munchas komunitas judiyas ke onoravan a los ambasadores del Papa i los reyes en las seremoniyas ofisiyalas. En 1648, el Rey Ferdinand de Prag aregalo a los Judios una bandiera ande ariva aviya un kepi de militaryo de Sueda, para rengrasyar a los Judios por la bravura ke amostraron en la gerra kontra la Sueda. En el siglo 160, las bandieras de los falsos profetas i mashiahes Salamon Molho i David Reuveni teniyan i alevantavan las bandieras ornadas de Magen David i Pasukim de la Tora. La primera aparisyon de la bandiera aktuala se ve en 1880, blanka i blu. Enfin en el kongreso Judios de 1897, la idea de David Wilson fue akseptada. Una bandiera ke mos akodra el talit blanko kon bandas blu. Esto es en kurto la istorya de las orijinas de muestra bandiera asta la epoka moderna.
