El 04.06.2023, alhad la noche tuve la okazyon de partisipar al konserto de “İkinci Bahar” en el salon de “Akatlar Kültür Merkezi” kon el direktor famozo, Kaan Sezerler. El salon estava yeno, munchos konosidos i amantes de los konsertos.
En primero “Edda Bardavid” izo una prezentasyon sovre este koro ke kreo Leon Esim en el anyo 2015, i dyo unos detalyos sovre las kantikas del konserto.
Despues envito a Leon Esim ke izo una avla en empesando kon “Vinido Bueno i Klaro”. Prezento el direktor Kaan Sezerler, i empeso el konserto.
Kaan Sezerler, despues de la eskola primera, en el anyo 1992, entro al Konservatoryo del Estado de Muzika de Turkiya, departamento de formasyon de instrumentos en la universidad “İstanbul Teknik”. En el anyo 1998, paso al nivel de lisensya i en 2002 termino komo primer de la klasa esta seksyon. Durante su edukasyon se aprovecho de munchos profesores maestros famozos en sus seksyones. El dyo konseres kon grupos diferentes en munchos paizes del mundo. Dyo lesones sovre kemenche klasiko. Tuvo un proyekto diferente, ke realizo el konserto de “Viyana a Estambol”, en utilizando los enstrumentos de la muzika turka kon los instrumentos de la muzika del oeste, en uzandolos endjuntos aserko las dos muzikas. El es el dirijente de este konserto, en mizmo tyempo es el patron de este proyekto i el direktor de arte.
Este koro esta azyendo las provas kon la prezidensya de Leon Esim, en la sinagoga de los italyanos. Este koro tyene la distinksyon de ser el primer koro del mundo ke adjunto las dos muzikas, la muzika turka i la muzika de los Sefaradis.
El primer konser fue en la sinagoga “Neve-Shalom” i despues en diferentes lugares dyeron munchos konseres. Kaan Sezerler esta kontinuando a lavorar en la muzika. En el anyo 2005, el kito un album ke se yama “Ocean”, un album de Kemenche klasika.
Eyos kantaron 25 kantikas en turko, en ladino, en ebreo i en espanyol.
“Eti Gümüşgerdan Grayf” kon “Niso Nahmiyas”, i “Tuna Mizrahi” son las solistas ke kantaron maraviyozamente. Unos kuantos ombres fueron solistos tambyen. Fue una nochada muy byen organizada i reushida.
“La kantika, Si yo fuera riko” kon el rolo del lechero “Tevye” en el müzikal, “Violonisto en el techo” fue prezentado por “Mişel Horada. El prezento “Tevye” kon su vistimyenta, kon su kante i kon su postura de una manera ekstraordinarya. Lo kero felisitar de aryento mi korason tanto me plazyo. Veramente es un grande talento de pueder djugar i azer el rolo komo kale.
La fiozofiya de este koro es: “La muzika es el alimento prensipal de la alma. La amistad es la vida mizma”.
Esto felisitando a todos los miembros de este koro famozo, i les esto ogurando muncha reushidad en todo los kampos…
Bravoooo!
