“Un findjan de kave tiene hatir durante 40 anyos”
Aun ke deve de ser un rumor, la istoria de esta dicha es muy umana. Avia una vez, en la eskala de Üsküdar un magazen de kafe frekuentado por todo modo de djente, de kreensias diferentes. En este lugar, las personas se arekojian i en beviendo kafe, azian konversasiones sovre sujetos diferentes.
Un dia entro un “Yenicheri” (Jenisario) al kafe i vido ke un kapitan grego esta asentado. Aparte del kapitan grego, el ordeno kafe a todos los ke estavan ayi. El patron se alevanto kalmamente i despues ke aparejo i sirvio todas las tasas de kafe, izo otros dos kafes i se fue a asentarse i a bever endjuntos kon el kapitan grego.
El “Yenicheri” se alevanto kon inyervos i le disho “yo no le ofresi a el”. El patron le respondio, “no te merikies, este kafe no es tu orden, es mi orden” i kontinuo a azer konversasion kon el grego.
Despues de 40 anyos, en la isla de Sisam (Susam) uvo una rebuelta i los gregos arekojeron esklavos para venderlos en los bazares. Par azardo, el patron del kafe de Üsküdar estava soldado entre los djaniserios turkos i los Gregos, kon otros soldados turkos los tomaron prizonieros i los trusheron al bazar de los esklavos para venderlos.
Dingunos no se estavan enteresando para merkar el patron del kafe porke estava muy viejo. Asperando su muerte, en supito fue merkado por un grego a un buen montante. Todos se enkantaron. El Grego lo tomo de la mano, lo yevo a un lugar silensiozo i le disho, tu sos el patron del kafe de Üsküdar. Yo te konosi i no me olvidi el kafe ke me ofresites antes 40 anyos. Se abrasaron, lo yevo a komer, le dio paras i lo embiyo a su paiz.
Es asi ke esta dicha “una tasa de kafe tiene hatir durante 40 anyos” mos vino asta muestros dias. En el mundo, la mijor vida no es la mas larga, ma es la mas rika en buenas aksyones.
“En todas las partes del mundo ay indjustisias i malas personas. Lo importante es de pueder bivir de manera ke se proteja la buendad natural del ombre”. Orhan Pamuk
