El 16 de avril, alhad midi fui envitada a la selebrasyon de Golden-Age ke fue en la eskola djudiya, “Ulus Musevi Lisesi”. Los volontaryos mos aresivyeron en la puerta de la eskola. Kon sus karas rientes, mostraron los lugares de asentar a los envitados.
En primero mos amostraron kon la barkovizyon, las aktividades ke izyeron en estos 20 anyos.
La sekreter de la organizasyon, enerjika i kapache “Verda Özsezikli” se okupo de todos los detalyos de la organizasyon.
Despues, las dos prezidentes “Rozi Hason” i “Luiz Karmona” izyeron una avla en kontando la misyon de esta organizasyon sakra ke se okupa de los aedados, i komemoraron a sus amigas, “Sara Hazak” ke era la dalkavo prezidente, “Beki İpekel”, “Ceni Strugo” i “Sara Behar”(z"l).
En supito, dos personas aparesyeron en el salon, azyendo riyir a la djente kon sus parodias anyos largos, dos artistos kon el nombre “Ande kedimos Moiz”, una ovra de teatro muzikal: “Jojo Eskenazi Gözcü” “Fani Bonofiel” i “Cenk Rofe” kon “Lizet Rofe”.
Mizmo ke ay kaji 10 anyos ke kedimos leshos de las parodias de “Fani i Jojo”, no peryeron nada de sus simpatias i izyeron riyir a todos los partisipantes.
Una shena kon Moiz i Kleret era, la vida ke pasaron durante la pandemia en kaza, otra shena kon Cenk i Lizet kon sus bozes ermozas, kantikas nostaljikas, estava koza de ver.
Vos kero kontar un spektakolo de chapeyos: Dos komputadores en la shena i en medyo en unos etajeres, chapeyos de formas diferentes i multikolores.
Moiz esta avlando en el zoom kon su kliente en italyano, un italyano eskalavrado medyo ladino, medyo franse se kere dar a entender para pueder vender.
Por la otra parte, Kleret esta djugando burako en el zoom kon sus amigas. Moiz no se esta puedyendo dar a entender kon su medyo italyano, Kleret esta vinyendo a ayudarle, metyendo los chapeyos a su kavesa uno por uno para pueder mostrarle al kliente. Entremientes le esta dizyendo a Moiz ke se vayga a djugar kon las amigas ke la estan asperando komo kuatrena.
Unas avlas komikas entre eyos kon los movimyentos i mimikes adjustados para pishar de riyir.
Otra parodiya ke esta pasando en el supermarket, los problemes de oy, la karestiya de todo, Moiz ke no esta entendyendo los presyos, le esta vinyendo chapetas i no kere pagar, mos izyeron olvidar los dias de la pandemiya ke estuvimos enkarselados solos i sekos en muestras kazas entre kuatro paredes.
Lizet i Cenk Rofe eskojyeron kantikas konosidas maraviyozas en diferentes linguas, ke pudimos akompanyarlos kon grande plazer.
En el klavye “Yusuf Sağlamlar”, en el buzuki i violon “Altuğ Öncü”, i en el tambur “İlker Arson” akompanyaron las kantikas ke Lizet i Cenk kantaron.
Estava una fyesta muzikal ke los espektatores sonrieron de vez en kuando i en las kantikas nostaljikas se atristaron.
“Jilda Abrevay” se okupo del sistem del sonido, i “Tuna Gözcü” fue la administratrisa de la aktividad.
A la fin lo envitaron al Gran Rabino Rav İsak Haleva para kortar el gató tradisyonal en la shena. Rav İsak Haleva komemoro al prezidente onorario “Bensiyon Pinto” (z"l) ke kontribuyo al establesimyento de Golden-Age.
Tambyen agradesyo su mujer “Eti Pinto”.
Entonses felisito a los aktores ke djugaron en la parodia i a los ke kantaron en dizyendoles: “El umor ke tenesh es un regalo del Dyo. Vos felisito senseramente por kompartir esto kon mozotros”, i izo una orasyon por eyos.
El Dyo ke mos ayege a reunirmos todos endjuntos kada anyo, kon sanedad i felisidad.
