En la sigunda gerra mondial, Los Almanes mataron un milyon i medyo de djudyos en el kampo de konsantrasyon de Auschwitz-Birkenau en Polonya.
Irena Sendlerowa, salvo kaji 2.500 kriaturas de los getos de Varshova.
KEN ES İRENA SENDLER
En 2008, tuve la onor de djugar esta vida amarga. Fin ke djugi su vida, malorozamente no saviya ken era i no teniya dinguna nosyon por esta mujer korajoza. Kuando vide el filmo “The Courageous Heart of Irena Sendler”,
tomi desizyon de djugar esta vida i azerla konoserla a munchas personas ke no la konosiyan.
Irena nasyo el 15 Febrero en 1910 en Polonya. Eran muy proves, el padre mirava a los hazinos menesterozos i no les tomava paras. Lo mas de los hazinos eran djudyos de sorte, todas las amigas de İrena eran djudiyas. Eya les ambezava en polako, las amigas le ambezavan a eya yiddish.
A los 17 anyos se konosyo kon el antisemitizmo en la eskola ande estava meldando pedagojia. En 1930, el governo Polonezo kito una ley ke las elevas polonezas se van a asentar a la derecha i las djudias a la syedra.
Esta endjustisya le toko al korason. Un diya no pudo rezistir, se asento a la syedra i grito “yo so djudia!”. Por esto fue arondjada de la klasa i tomo punisyon de no kontinuar un anyo a la eskola.
En 1939 salyo la gerra mondial. Los ombres estavan en el fronte, eya estava ayudando a los firidos, kuando le demandavan, "İrena! Deke ayudas mas muncho a djuyos?” Eya les respondia komo le ambezo su padre:“Ni ley, ni rasa, ni nasyonalidad no te va enteresar! Todos son personas".
Akeos anyos de gerra, los djudyos estavan en una situasyon muy mala, los estavan arekojendo para yevarlos a los kampos de konsantrasyon. Irena kon kuvertura de infermyera estava entrando a los kampos, les estava yevando komidas, kuras i vistimyentas. Estava penando para salvar kriaturas. Los estava fuyendo en los kamyones de syerkol, de las paredes, de las kanalizasyones, los estava tomando de los brasos de las madres, los estava yevando a famiyas kristyanas.
Estava eskrivyendo los nombres i alkunyas de las kriaturas en unos papelikos i los estava metyendo en unos kavanozes. Dospues estos kavanozes los estava enterrando debasho de un arvole kon esperansa ke dospues de la gerra los va entregar a sus famiyas. Kuantas vezes la aferaron, komyo haftona ma eya nunka no deklaro ande estavan estas kriaturas.
Akeos tyempos en Polonya no salvar un djudyo, dar una kupa de agua a un djudyo era kondanado a muerte.
Esta mujer korajoza, en syendo kristyana parvino a salvar 2500 kriaturas de los kampos de konsantrasyon.
Dospues ke eskapo la gerra, İrena koryo al arvole ande enterro los nombres de las kriaturas i salyo en bushkida de las famiyas.
Malorozamente todos estavan en las listas de muertos. Peno i lazdro i parvino a mandarlos a la tyerra santa.
Este sakrifisyo anyos i panyos no se supo. Asta ke unas kuantas elevas de universita estavan aparejando un tez enriva el olokosto, toparon un livro nombrado “LA MADRE DE LOS IJOS DEL OLOKOSTO”. Estas amigas fueron a Polonya, la toparon a İrena en un ospital i les konto su vida.
Irena Sendler muryo a 98 anyos en 2008 en Polonya.
“NUNKA MAS”.
