El mez de Avril mos da la nuvela ke ya vyene enverano. Los diyas se alargan, la natura se arebive, empesamos a azer planos de vakansas i kampanyas. El mez de Avril para mi tyene otra emportansa. Porke nasi en Avril, porke Pesah es el moed ke me plaze i mos arekoje la famiya i komemos komidas diferentes. Avril es un mez diferente de los otros mezes porke bivimos la alegriya kon la tristeza en mezmo tyempo. Mos alegramos kon la salvasyon de Ayifto i ke adjuntimos la libertad. Dospues mos atristamos kon el yom aShoah ke es el mas grande malor del puevlo djudyo. Yene en Avril komemoramos yom aZikaron por los ke muryeron en las gerras para salvar la patriya, detestamos el terorizmo por los ke muryeron en los kales azyendo orasyon sin kulpa i sin pekado i en mezmo diya fyestamos el diya de la libertad.
Keridos lektores a la otra semana es Pesah….
No so del todo relijioza ma me plaze los moedes, las tradisiones. Achakes de los moedes i tradisiones se aunan las famiyas. En mi chikez, apenas eskapava Purim, en las kazas enpesava un movimyento. En primero era enkalar la kaza i despues kon sira era lavar las mantas i dar los kolchones al hallach. Mi nona ya enpesava azer planos del seder de Pesah. Kuando se aserkavan los diyas era majar la moez, pasar la prasa por el tropito, eskaldar espinakas, kuantos kilos tomava mi madre no se, me akodro en un legen blanko ke era legen de Pesah, avia tanta espinaka ke no topava de pensar kualo se va azer. Entrar al mupak era defendido no seya ke mesklemos el hamets al kasher. El haroset por siguro se azia en kaza komo todo lo ke se komiya. No aviya nada pronto ni cateringes. Mi papa trayiya a kaza kaji 150 guevos. Kreo ke en dinguna ley mas de mozos, no egziste emplear 150 guevos en una semana. El diya de kalhamira era untar siraj i parladearlo (esto era mi echo) kemar la migita del pan, aparejar la meza, ir al banyo, vistir lo muevo ke mos merkaron i los kalsados de rugan. Oy por siguro no kedo ni enkalar kaza, ni dar kolchones al hallach, ni pasar la prasa por el tropito, ni estrenar kalsados de rugan ma de vez en kuando digo akeos diyas ya teniya otra savor. Es verda ke troko todo ma el uzo del Seder de Pesah no troko ni va trokar nunka.
Vos oguro una agada alegre, una enveranada buena kon sanedad i prosperidad.
HAG PESAH SAMEAH!
