Israel, en relasion a su populasion, es el paiz ke partisipa lo mas, en la revolusion de la teknolojiya. En el Oriente Medio, Israel es el uniko paiz de grandes meoyos, i de enerjiya.
Durante mas de sesenta anyos, Israel estuvo en gerra, fue el objektivo de munchos atakes teroristas, i fue boykoteado por sus vizinos. En mezmo tiempo, reusho a fondar una nasion, kreo miraklos de agrikultura de su tierra infruktioza, i se transformo en uno de los paizes los mas teknolojikos del mundo.
Komo pudo Israel azer tantas inovasiones en la teknolojiya?
Segun el direktor rejional de Google, los pioneros ke fondaron Israel, son los empresarios ke riskaron muncho. Israel no teniya manaderos, tambien aviya amenasas del eksterior. Ma los pioneros tuvieron una grande vizion de fondar un paiz tan reushido.
La kultura i la relijion judiya mos permete de kestionar todo, i de azer diskusiones sovre todo. Por munchos sientifikos, lo ke es eskrito, i lo ke es publikado es la verdad. Por los sientifikos israelianos, lo ke es publikado deve de ser kestionado, i se deve de azer mas munchas investigasiones para topar mijores solusiones.
Segun el eskritor i analisto, Dan Senor, kada soldado israeliano se ambeza en el kampo de gerra, a ser lider i a topar remedios por todo. A una edad muy temprana, los mansevos israelianos se azen fuertes, i ganan eksperiensas.
Otro faktor en la reushita de la teknolojiya i de la ekonomiya de Israel, es la emigrasion kontinual a este pais. Israel gasta grandes montantes por la ekonomiya i por la emigrasion. Ay mas de setenta nasiones reprezentadas en Israel. La rapida entegrasion de los emigrantes despues de asistir a un rapido program de ebreo, prokura la partisipasion de estos emigrantes a las innovasiones del pais.
Kon la emigrasion Sovietika, 750 000 emigrantes entraron a Israel. Miles de estos emigrantes tienen grados emportantes en matematika, i en siensia. Esta djente kon talentos teknolojikos krearon muevas inovasiones. El sektor de Hi-Tech va mano kon mano kon la emigrasion de meoyos grandes.
Munchas de las inovasiones ke salen de Israel trokan la vida de muncha djente en el mundo entero.
Los diyas ke Israel eksportava portokales kedo muy atras. Todo modo de inovasion en Israel es bazada en investigasion.
El mundo tiene de ambezarse muncho de Israel, espesialmente en estos anyos ke ay grande menester de inovasiones bazadas en stratejias ekonomikas.
Estas inovasiones no son solo por la prosperidad del puevlo de Israel, ma tambien por la prosperidad del mundo entero.
Israel esta partisipando a la teknolojiya del mundo en munchas maneras. Israel es uno de los paizes lideres en el kampo de la investigasion bioteknolojiya.
Los israelianos transformaron este chiko pedaso de tierra en un oasis.
