Mizmo ke ya paso una semana, kije partajar mis sintimyentos sovre la MUJER, keridos lektores.
El ocho del Marso es el Dia Internasyonal de las Mujeres, es el rekuerdo del dia espesyal de la ganansya de los derechos de la mujer. En el anyo 1860, las lavorantes de tekstil en New York kijyeron una vida komo benadam i lucharon por una vida kon igualdad, sin apartamyento, i tener todo modo de derechos komo los ombres.
Las Nasiones Unidas, O.N.U. en 16.12.1977 dyo la desizyon de fyestar este dia del ocho de Marso kada anyo.
Las mujeres son muy aktivas seya en sus kazas, seya en sus karyeras, saven lo ke keren i arivan a sus butos.
Kon sus kalmo i entelijensya, reushen en sus profesyones solas u kon sus ekipas. Enfluensan kon sus avlas dulses, i konvensen al d’enfrente.
Eyas son madres de sus ijos, mujeres de sus maridos, i tyenen munchas ovligasyones i responsabilitas en sus nidos. Estan reushendo en munchos espasyos emportantes.
Eyas koryen a todo modo de kozas, abastesen, krean un montante de echos ke es difisil de pensar mizmo.
Oy, munchas mujeres estan en un nivel igual de los ombres en los espasyos politikos, ekonomikos, komersyal i voluntaryos. Unos echos ke son imposibles de realizarsen, se pueden resolvar kon la entelijensya pratika de las mujeres.
Por egzempyo en la Amerika aviya unos kuantos anyos ke una mujer muy reushida estava reprezantando el ministeryo del eksteryor. En esto kero komemorar una de las mas grandes mujeres del mundo ke desho una trasa inolvidavle en la istoria kon su kapachita, su semplisita i su kerensya. En este dia espesyal kero nombrar a esta maraviyoza mujer ke admiri syempre: GOLDA MEIR.
Golda Meir dirijo un pais muy emportante del mundo. Rezolvo munchos problemes kon su entelijensya, su dinamizmo i su intuisyon i fue reushida. Me akodri de una konseja en este sujeto.
Ben Gurion en 1947 para fondar el paiz de Israel, establesio un partido kon su ekipo ke le ayudaron.
Los myembros de este partido eran todos ombres kon solamente Golda Meir, la mujer unika. Kuando los inglezes se apersivyeron, serraron el partido, i echaron en prezo a todos los ombres. Komo Golda Meir era mujer, la desharon libera.
Uno de los myembros disho al amigo: “A mozotros mos aprezaron, ma eyos no saven ke la mas valutoza, la mas kapache de entre mozotros esta afuera”.
Esto mos amostra ke munchas mujeres komo Golda Meir estan adelantre de los ombres en los echos emportantes de los governos. Eya fue una de las fondatrises del pais.
A las mujeres les plaze ke sus keridos esten en el doredor, ke se akodren de sus dias espesyales; komo dia de nasimyento, dia de kazamyento; (avizo a los ombres!...) i esto amostra ke son muy sentimentales.
El ombre i la mujer son “dos puerpos i una alma”, son iguales.
Las mujeres toman munchas responsabilitas debasho de sus alas kerensyozas. Eyas son las kolonas emportantes de sus famiyas, i nunka ke no se derroken.
Entonses kero felisitar todas las mujeres del mundo entero por sus kerensyas, sus entelijensyas, sus kapachitades por amenajar sus famiyas i el dorredor de sus echos profesyonales. Ke nunka no manken porke eyas son el ekilibro del mundo.
