Keridos lektores, despues de la katastrofa de la semana pasada kije mirar kualo es dicho en la Torah i en la istorya Djudia.
La palavra en Ivrit "ra'ash", komo sus ekivalentes en Asiryo i Arabo ke dezinyan un “terremoto” (o raash en Judeo-Espanyol), es indikativa de un grande bruido, tumulto o un muvimyento terivle. En los Tehilim, la mizma palavra se uza para deskrivir la boz del trigo en el ayre. Tambyen se uza en las poeziyas para ekspresar el kanto koral armoniozo de los andjelos. Ansi parese ke durante un raash, los Ebreos estavan mas empresyonados por los turuelos i bruido ke eyos lo konsideravan komo una teofani, komo la aparisyon del Dyo (Isaiah. 5:25). El meneyo fuerte i el umo de las montanyas, komo durante la revelasyon delantre el Monte Sinay (Exodus xix. 18, xx. 18), los movimyentos de los pilares de las puertas, komo durante la inisyasyon de Isaiah (Isaiah 6:4), ke akompanyan las grandes aparisyones del Dyo, deven ser, por syertos otores, konsiderados komo raashes (Melahim 19:11-12).
La Palestina estuvo sujeta a frekuentes raashes, la baza volkanika de la rejyon al doredor de la Mar Muerta i del Lago de Tiberias es una de las razones kontribuyentes. El raash mensyonado en Ahab (I Melahim 19:11) es una leyenda, ma el de Uzziah (809-759 a. c.) es verdadero: el tyempo se empeso a kontar a partir de este evenimyento (Amos 1:1; Zachariah 14:5). Ibn Ezra i R. David Ḳimḥi se referan a todas la profesiyas de Amos, spesyalamente a Amos 9:1, a este raash.
Josephus deskrive un raash ke akontesyo en Judea durante la batalya de Actium. La tyerra se meneyo komo una kuna i muryeron munchas bestias i mas de 10.000 personas (Antiquities 15:5, § 2). El raash a la muerte de Yeshu se mensiyona en Matathias (27:52), ma no en los otros livros Evanjelikos. Unos kuantos anyos antes de la insureksyon de Bar Kokhba, las sivdades de Cesarea (Kisarya) i Emmaus (serka de Yerushalayim) fueron destruyidas por un raash grande. En 499, raashes fuertes derrokaron la Asia Minor, kontinuando asta 502, kuando se derroko la sinagoga en Beirut. Antiochia (Antakya) fue vijitada por numerozos raashes en el siglo VI (Procopius, "De Bello Persico," 2:14; Evagrius, "Historia Ecclesiastica" v. 17, vi. 8). Bar Hebræus, 'Abd al-Laṭif i la "Gesta Dei per Francos" mensyonan munchos raashes en Palestina durante la Edad Media. El 1 de Enero 1837, toda la rejyon de Galilea se meneyo; las sivdades de Safed i Tiberias sufriyeron spesyalmente, durante este raash mas de 4.000 Djudyos muryeron. La perturbasyon sismika tambyen se sintyo en Tira, Sidon, Beirut i afilu en Yerushalayim. Devemos de sinyalar ke Yerushalayim fue libre de raashes antes de esto (Robinson, "Biblical Researches in Palestine", etc., iii. 500-585; "Jerusalem", v. 295).
Los raashes, segun syertos relijyozos, son un kastigo divino por sus performanses en el sirko i el teatro de los paganos, o por sus immoralidades. Otros sostyenen ke los raashes estavan destinados a akodrar a los ombres sus pekados. Kuando afita un raash, komo un turuelo i un relampago, se deve meldar la bendisyon: "Alavado seas, Eterno, kon tu poder i fuersa esta yeno el mundo" (Bereshit 9:1). Un kapitolo sovre "Turguelo i raashes", en forma de kalendaryo se topa en el apendis de "Milḥemet Ḥobah", emprimado en Constantinopla, 1710.
Tresladado i adaptado de “Jewish Encyclopedia: Earthquake” Emil G. Hirsch, Samuel Krauss
