“Silva Filiba” me embiyo un teksto en turko, ke eskrivyo sovre la “Sonriza”, ke es emportante por tener relasyones kayentes kon el entorno. Lo traduizi al djudeo-espanyol para partajarla kon vozotros keridos lektores.
- Una sonriza no kosta nada i produse muncho.
- Enrikese al ke lo resive, sin emproveser al ken lo da.
- Dura solo un momento, ma su rekuerdo kontinua syempre.
- Dingunos no son tantos rikos por no pueder tomar, renonsyar a la sonriza, i dingunos no son tantos proves para no mereserlo.
- La sonriza krea la felisidad en la famiya. Es el sinyo sensible de la amistad.
- Una sonriza deskansa al ke esta kansado.
- Da koraje a los ke no tyenen koraje para avlar.
- Es el remedyo natural de todas las dolores. Ma no se puede merkar, no se puede emprestar, ni arrovar porke es una koza ke tyene valor del momento en el kual se da al den frente.
- I si en vezes te rankontras kon una persona ke no te regala la sonriza ke mereses, dale la tuya jenerozamente. Porke, dingunos no nesesitan tanto una sonriza, komo akel ke no puede darsela a los otros.
- Una sonriza es la forma mas barata de trokar muestro aspekto.
- Es mas fasil obtener lo ke se dezea kon una sonrisa, ke kon la punta de la espada.
- La sonriza es una verdadera fuersa vital, la unika posibilidad de mover al ke esta durmyendo.
- Empesa kada dia kon una sonriza, i mantenla todo el dia.
- El bebe rekonose a la madre por la sonriza.
- Los mijores doktores del mundo son: el Dr. Alegriya i el Dr. Trankilidad.
- De vez en kuando tu alegriya es la fuente de tu sonriza, ma de vez en kuando tu sonriza puede ser la fuente de tu alegriya.
- La sonriza es la lingua de la alma.
- Las sonrizas son kontajyozas komo la grip, kuando uno me sonriye, i yo sonriyo.
- La sonriza es la yave ke avre el korason de todo el mundo.
- Una sonriza es el mijor makyaj ke una mujer puede tener en su kara.
- Uza tu sonriza para trokar el mundo, no deshes ke el mundo troke tu sonriza.
