El motor de bushkeda, Google, dio una definision arebashando al biervo “’’judio”. Google efaso la definision bastante ofensiva ke su motor de bushkeda estava dando a los ke bushkavan la palavra "judio". Un fonksonario de Google, embiyo un tweet dizyendo ‘’Mos ekskuzamos’’. “Google otorgara lisensyas de definisiones de ekspertos en diksionarios de la tresera parte. Amostramos definisiones ofensivas si son la sinyifikasyon prensipal de un biervo…”. Google agora lo bloko.
Durante un kurto periodo de tiempo la semana ke pasimos, el rezultado prensipal para "judio" era: "negosiar kon alguno de una manera eskasa". La definision apartiene a un partener de Google yamado Oxford Languages, ke se aksepta komo "el editor de diksionarios lideres en el mundo" kon mas de 150 anyos de eksperiensia. “Los diksionarios de ingles de Oxford son konsiderados komo las fuentes las mas otorizadas del mundo sovre el ingles aktual”, deklaro su sitio web. Oxford Languages marko su definision komo "ofensiva", ma ensistio ke es el uzo el mas komun de la palavra judio.
Durante la Edad Media, munchas komunidades evropeas limitaron las oportunidades profesionales de los judios, permitiendolos de servir solo komo
komersantes i emprestadores de paras kon entereso, ke la aktividad de la Eglizia Katolika impedio para los kristianos a partir de 1179. Teologos katolikos eskrivieron sovre las supozisyones negras de dar kredito, kreando la sansasion de ke los judios ke emprestavan moneda kon la entision de obtener ganansias, eran de alguna manera eksepsionalmente terrivles; mezmo ke los judios, en emprestando paras, estavan asegurando likidita (paras) a las komunidades evropeas. En Inglatierra, durante la Edad Media, los judios eran formalmente konsiderados “propiedad de la Korona” i se esperava ke empresten al monarko i a los nobles. En Polonya, en el siglo XIII, el rey Boleslao el Piadoso deskrivio los judios de su tierra komo “esklavos del Trezoro” i esperava ke djugen un rolo asemejante. En la dekada de 1700, el istoriador Howard M. Sachar estimo ke “mas o menos asta los tres kuartos de los judios de la Evropa Santral i oksidental se limitavan a la okupasion de vendedor por la kaye, i emprestador de paras por entereso.
