En una prizyon de la Amerika se topavan munchos prizioneros kon kulpas seriozas. Uno de estos era James. James era kondenado a muerte. Iva ser matado ensima de una siya elektrika. El diya de la ekzekusyon vino el direktor de la prizyon i le propozo una koza. Le disho, “Mira, de todo modo ya te vas a murir porke tus kulpas son muy seriozas. Te vamos egzekutir ensima de una siya elektrika. Ma si akseptas la forma de muerte ke te vamos a propozar, despues de tu muerte vamos a pagar a tu famiya 20 milyones de dolares.” James se penso, se penso i aksepto, en pensando ke su famiya al menos va pueder bivir repozada.
El doktor de la prizyon le ekspliko komo va ser la egzekusyon. Le disho: “Te vamos a dar tres serumes. El uno blu, el otro vedre i el treser kolorado. Kuando te vamos a meter el primer serum blu, tus piezes i tus manos se van a ampesar a endormeser avagar avagar. Despues ke se eskapo el serum blu, te vamos a atar el serum vedre. Kon el serum vedre vas a sintir ke las pachas i los brasos i tanbien tu kavesa se van a endormeser. I kuando se va eskapar i el serum vedre, te vamos a atar el serum kolorado, vas a sintir ke tu puerpo se va endormeser i tu meoyo tanbien, i tu korason va ampesar a batir mas avagar i avagar i a la fin se va kedar. Ansina vas a tener una muerte dulse”. “Ok, muy bien” disho James i lo yevaron a una kamareta, lo echaron, i le ataron el primer serum, ke era el serum blu. Despues de unos kuantos minutos, ampeso a sintir sus piyezes i sus manos ke se estan endormesiendo. Eskapo el serum blu, le metyeron el serum vedre. Kurto, todo lo ke le disheron fue komo estava planeado. I a la fin James muryo. Los direktores i el doktor de la prizyon sinyaron el akto de la muerte i pagaron a su famiya, la suma ke le prometyeron a James.
La verdad era ke esto era un eksperimento medikal. I estas paras eran las paras ke davan a los voluntarios. I kualo aviya en estos serumes? Nada mas ke aguas boyadeyadas. Ma el meoyo ya estava pronto a kreyerse de lo ke le kontaron. I James se muryo de si para si, solo kon la idea. Esto era el efekto del meoyo.
