Estos dias, en el Palais d’Orsay (Paris), ay la ekspozision del pintor, Edward Munch. Kon su tablo “El Grito”(1893), se izo konoser mundialmente. Nasido en Loten, un kazal de la Norvejia, perdio a su madre kuando tenia 5 anyos i despues a su ermana kerida Sofi, de tuberkuloz. Su padre, doktor pratisien, muy relijiozo i muy strikto, lo terrorizo a el i sus ermanos, durante toda su chikes. Despues del lise, se inisio para azerse injenior, ma abandono sus estudios para empesar una kariera artistika i se dediko a la pintura. En 1889, resivio una burs para estudiar en Paris. Esta epoka marko su formasion i su sentido de la perspektiva i de la estetika. Van Gogh, Gaugin i Toulouse Letrec fueron los pintores ke lo influensaron lo mas muncho.
Desde su difisil istoria familial, asta su propia eksperiensia de depresion i todos los evenemientos de su vida, lo yevaron a ser un kreador de una de las pinturas las mas famozas de la istoria, “el grito”. Konsiderado komo un jenio, fue uno de los grandes del ekspresionizmo i prekursor del modernizmo. Sus temas de pintura, fueron liados a su depresion i a su mirada negativa a la egzistensia. Pintor de la ansia, del espanto, de la hazinura i de la muerte, se dediko a pintar la kara de la psikolojia umana.
Malgrado su vida difisil, fue un pintor eksentriko, inovativo i muy produktivo. Desho mas de 1000 kuadros, 15400 gravures i mas de 4500 akuareles. Los Nazis klasifikaron su ovra komo arte dejenerado i konfiskaron 82 de sus kuadros de varios muzeos alemanes. 72 fueron rekuperados a traves de koleksionarios. “El grito” i “el ninyo enfermo”, fueron las ovras ke refletaron la perdidad de su madre i de su ermana, viktimas de tuberkuloz. En 2012, “el grito”, se vendio en New York por 119.9 miliones de dolares i esto fue un muevo rekor istoriko.
Malorozamente, este jenio melankoliko i alkoliko, murio kompletamente solo, siendo el mijor pintor norvejiano. “La erensia de los jenes hazinos ke resivi de mis parientes, me izo detener de kazarme, para no kometer una kulpa enverso yo mizmo”, disho el artisto.
Si par azardo pasash por Paris, malgrado su vida oskura, la ekspozision vale la pena de ser vijitada.
