Sevi Avigdor
Moiz torno a kaza una tadre del echo i sin dizir nada en supito se echó a la kama.
Simhula, la mujer entró en mirikia al verlo tan demudado i pálido.
Ke te pasa kerido, ke te afito?
En el echo, en duna me ize pies kon kavesa, me suvió una kayentura i una dolor de tripa ke el Dio no te de, kerida mia.
Ke komites, ke te indjideó a este grado?
Yamaré al doktor pishin para ke te mire i te trayga la salud buena.
Agora me se está unflando abasho de la tripa, ke no sea una kevradura ke fue lo ke tuvo mi padre?
El doktor yega ma me esta viniendo difísil de entenderlo porke es un poko peltek i demanda si salgo del kuerpo bien o si tengo shushurera; me mete la presión i la topa muy alta; se espanta ke me puede kayer gota ke puede paralizar achakes de sangre en el meoyo.
Munchas vezes esto viene de sikinti i dertes ke da la vida.
Puede ser ke le echaron ojo a mi marido? demanda Simhula i rekomenda traer a la mujer ke mira el kafé para dizirte el mazal i para ke te eche unos livyanos para amejorarte.
Puede ser ke tengo rak doctor? No kiere pensar en esto ágora, tu deskansa i toma esto para ke te abashe la kayentura.
Me tomo la sangre para ver si tengo azúkar i me demanda si pisho mucho i me aze alevantar en la noche, agora me oye los pulmones para saver si ay pleuresia ke es agua arientro los pulmones.
Después de unos días, Moiz empezó a sentirse mejor ma al kaminar tenía el bel tomado kon dolor por estar echado en la kama por tantos días. Simhula le metió ventozas kon vazos i algodón ensendido en el bel para ke chupen todos los males y los kiten afuera, esto lo mejoro ma le salieron unas negrigones en la espalda.
De esta manera Moiz torno a su echo.
Muy kontento disho,
UNOS NASEN KON MAZAL I VENTURA LOS OTROS KON POTRA I KEVRADURA
Terminolojia medikal kon traduksion al ingles:
Kayentura - fever
Kevradura - hernia
Peltek - stutterer
Asúkar - diabetes
Rak - malignancy
Nigrigones - hematomas
Shushurera - diarrhea
