O mi puevlo!
Tanto aharvado,
Por todos arepushado,
Alevanta tu kavesa abashada,
Enderecha tu espalda kansada,
Para ti siempre briyara la luz de la menora.
+++++
O mi Puevlo!
Tu sielo mas no se areskurera,
Tu Gloria lo aklarara,
Las nuves se espajaran,
Adelantre kaminaran.
+++++
O mi puevlo!
Alevanta tu bandyera de la Fey,
Mostra el kamino de tu Ley,
Para ke el mundo entero veya ke semos eternos.
++++++
O mi puevlo!
Ven asyenderemos las hanukiyas,
Para akodrar las maraviyas,
Ke mos amostro muestro Salvador,
En ora de ansya i dolor.
++++++
O mi puevlo!
Sufriyensa mas no tendras,
De adelantre kaminaras,
Porke en kada ijo de Israel ke nasera,
Un muevo Makabe se alevantara.
