Einstein dize ke todo es relativo. El, avla de siensya, ma yo kreyo ke en la vida, en el mundo todo es relativo. Kada idea se interpreta de una manera diferente. Todo depende del punto de vista, del angulo ke se mira.
En la vitrina de una sala de fitness, (de meterte en la linya) un anunsyo amostra una mujer byen garboza, en bikini, tomando sol, kaji ke te esta envitando a nadar. El teksto dize: “ Este enverano keres ser una sirena o una balena”? Una mujer de puerpo byen leshos de la ke esta en el anunsyo embiya a la sala su enterpretasyon del anunsyo:
- Los amigos, las amigas de las balenas nunka las deshan en el kanton. Tyenen admirantes komo los delfines, las fokas, inkluso personas kuryozas...
- Tyenen una vida seksual aktiva, kedan prenyada, paren bebikos balenas muy savrozos.
- Nadan en la mar, djugan, mizmo tyenen el mazal de ver lugares maraviyozos komo los korales de las islas de Polinezya.
- Saven kantar kantikas alegres. Mizmo tyenen un CD ke kitaron no aze muncho tyempo.
- A parte de syertos umanos, no ay dinguna kreansa ke se aserka de eyas para danyarlas, para maltratarlas.
Avlando de la sirena, a empesar ke no uvo i no va aver nunka sirena.
- Akseptando ke egzisten, van a tener un gran balagan para saver ke identidad tyenen, azyendo kolas largas delantre del psikologo para saver si son pishkado o mujer.
- No tyenen dinguna vida seksual. I no tyenen lo nesesaryo para bivir una vida seksual.
- No pueden tener kriyaturas. I ke ombre se va aserkar de una mujer ke gole komo pishkado.
- Por fin, yo prefero ser una balena. Los anunsyos amostran solo las personas delgadas komo ermozas. Ama yo prefero chupar una dondurma kon mis ijikos, tener un moabet alegre kon mi marido, partajar una chikolata kon mis amigas. Kon el tyempo, estamos tomando kilos, porke estamos metyendo tantas saviduriyas a muestra kavesa ke no estan kavyendo mas i se estan repartyendo a las otras partes de muestro puerpo. Por esto, mozotros semos yenas de kultura, byen edukadas i muy orozas.
- Einstein disho ke todo es relativo. Esta mujer disho “Dame godrura, te dare ermozura”.
