Para ser bohor kale ser el primer ijo nasido normalmente de un kupl kazado. Ser el ijo uniko i el ijo grande de la famiya. Estos titolos krean fantaziyas i muevas esperansas en los muevos i mansevos kuples. Munchas vezes este ijo grande es tanbien el inyeto i en vezes el primer bizinyeto para los nonos emosyonados.
Este ijo grande ke dainda no tiene ermanos, no tiene de menester de kompetir i amostrar ke el es mijor de su ermano/ermana. Dingunos pueden arovar o partajar la atansyon i la amistad ke ve de su famiya. El siente ke sus padres estan dispuestos a azer todo lo ke el dezeya, ke el merese todo i ke el mundo esta destinado a sirvirlo solo a el. Munchas vezes estos ijikos bohores se ven komo la esperansa de la famiya. Sus padres esperan ke seyan perfektos i ke reushkan en todo. Dingunos no le demanda lo ke eskoje i nase en munchos kavzos la eleksyon echa por eyos.
Estos ijikos toman muy bien los mesajes de sus padres i en munchos kavzos sienten la ovligasyon de akumplirlos para no dezilusyonar sus paryentes. Los padres sin eksperiensa ven sus ijos bohores komo sus kartvizit ke es una konfirmasyon de sus suksesos ke pensan ke si mi ijo reushe, es un sinyo ke mozotros semos paryentes reushidos.
Por esta razon, munchos bohores o primeros ijos tratan de ser ijikos buenos, repozadikos i disiplinados. Un bebe muevo nasido en la famiya, puede no ser un evenimyento fasil para el bohor. Tiene la impresion komo ke le kitaron la korona de su kavesa. Pasan penserios difisiles por su meoyo komo: “Puede ser ke mis paryentes no estan kontentes de mi i puede ser ke mas no me keren bien.”
Los paryentes asperan ke el ijo grande aksepte los kaprichios de el chiko i ke amostre su responsabilidad aunke el mizmo es un ijiko dainda chiko. Munchas vezes tanbien se le demanda de ayudarles en diversos echos ke no son proprios para su edad chika. En vezes la edukasyon del ijo grande o del bohor, es visto komo terbiye. Un padre ke tuvo una chikes difisil kere darle a su ijo grande lo mijor de todas las kozas ke el keriya i no aviya resivido. Ansina, el paryente kere adovar los anyos difisiles ke paso en su chikes i restorar el sentimiento de sus firidas.
Ma, el primer ijo puede transformarse en un ijo egzijente i puede tener una vision ke lo merese todo en el mundo. Komo rezultado puede esforsarse a akseptar la realita del mundo i puede estar en kombate kon el mundo ke lo entorna. En munchos kavzos se ve ke el ijo grande de la famiya es mas ambisiozo i mas talentozo.
Reushen mas muncho de los sigundos. Es muy emportante de ver ke i el ijo grande es komo todos los otros ijos. Kale permeterlos ke djugen i ke bivan su chikez.
Eyos pueden azer yerros komo todos. No tienen de menester de demonstrar nada a dingunos ma kale ke mos ambezemos a akseptarlos tal ke eyos son. Los paryentes kale ke les amostren su amor i kerensya, de todos modos de su komportamiento. Los paryentes deven salir a bash kon sus rekuerdos difisiles de sus chikes i no a traves del ijiko i deven de guadrar sus esperansas para si mizmos.
