Munchos anyos antes la medisina no era muy avansada komo agora. No aviya munchas kuras para kurar las hazinuras las mas frekuentas. El mas simple egzemplo es el Aspirin, los antibiotikes o el kortizon i mas munchas kuras. Kreyo ke no konosiyan mizmo los dezrepozos. Kualo es kolesterol? Kualo es Lipid? Kualo es diabet? Kuando tienen tansyon alta, kualo deven de azer? Nada de esto no se saviya. Malgrado esto teniyan remedyos de mujeres d’al tiempo.
Si tienes dolor de tripa, por siguro ke te se dezato el umbligo, te metere un findjaniko kayente kon ajiko, ke te arekojga la dolor.
Si tienes dolor de espalda, te echare ventozikas. Pishin te toma la yelor.
Si tienes inyervos, mete unas kuantas damlayikas de kolonya aryentro de una kupa de agua, i se avren las alas del korason.
Si te sientes sin fuersas es ke te toko ojo, te aprekantare kon 7 klavikos de komer, te vienes en ti.
Siguro estos remedyos eran remedyos non danjerozos. Aviya i dainda ay, remedyos ke en vezes pueden kavzar mas mal ke provecho.
Yo me akodro ke un paryente teniya dolor de espalda por modo ke sufriyiya de herniya diskala. Los doktores le disheron ke kaliya ke se operara. Ma los amigos ke eran mas “savidos” de los doktores disheron: “Ke te vas a ir debasho del kuchiyo? Te va yevar a un lugar, sin operasyon te vas azer bueno”. I lo yevo ande uno ke era muy famozo por estas kozas. El ombre le travo la pacha, lo enkolgo del bel al tavan i no savemos lo ke izo mas, a la fin este ombre ke sufriyiya de dolor de espalda kedo infirmo su vida entera!
Vos kero kontar un rekuerdo de mi chikes kon unos guzanos desagreavles, las sangsuelas.
En lo ke yo era chika moravamos en Galata en una kaleja ke kaje todos eran judios. Me akodro ke en el apartamento djusto enfrente de mozotros morava una mujer en el primer kat. Una mujer muy godra ke no se meneyava de delantre de la ventana. Ansina siempre ke saliya i tornava yo la viya asentadika aya. Una vez la vide en la kaleja. Desparte ke era muy godra teniya i las pachas muy godras.
Un diya vimos una ambulans en la kaleja i djente koryendo por aki por aya. Siguro todos salyeron por kudyado. Mos ambezimos ke esta mujer godra se metyo de estos guzanos a la pacha. A la noche estos burakos ke izieron los guzanos no se serraron por ke la mujer teniya diabeta. I se le vazyo la sangre entera por akeyos burakos. La demanyana la toparon dezmayada aryentro las sangres. La yevaron al espital ma malorozamente no la pudyeron salvar.
Por esto sin saver, no kale tener ayudo de lo ke yaman "medisina alternativa".
Vide en la televizyon ke mizmo en bevyendo agua no kale egzajerar porke puede kavzar “entosegamiento de agua”. Puede kansar los renes.
