Despues de dos anyos, el 13 novembre, diya de alhad, en la sinagoga NEVE ŞALOM, aresivimos kaji 2500 musafires non-djudyos, fyestimos el diya europeo de la kultura djudiya en bivo. Veramente un diya muy benefisyozo para dar a entendermos i azermos konoser.
El program empeso kon el koro de la sinagoga kon kantes relijyozos i fue dirijido por CAKO TARAGANO. En mezma ora aviya la konferensya de KAREN ŞARHON ke dyo a entender la lingua ladino, dande salyo, ken la avla i eskapo kon un ermozo tango ke plazyo muncho. Uvo munchas prezentasyones, todos los avlantes dieron a entender el djudaizmo maraviyozamente. Seya de la politika, seya del olokosto, del gizado sefaradi i estuvyeron dando repuestas a todas las demandas. Ma para mi lo mas mijor fue el program “gelin tanış olalım” “vini mos konoseremos”. Se realizo en kuatro partidas, los avlantes todos byen savidos, dyeron a entender ke ay siglos i siglos ke bivimos en estas tyerras kon amor i ardor, ke todos semos de nasyonalidad turka i de relijyon djudiya i no tenemos diferensya de otros. Los oyedores se kontentaron de ambezar lo ke no saviyan, i mezmo lo ke saviyan yerrado.
Lo mas enteresante era de ver elevas i elevos de las fakultas de teolojiya demandando demandas, travando fotos i tomando notas. El buto de este diya fue alkansado i valyo la pena de todos los ke organizaron el diya.
El final fue komo kada anyo kon una boda djudia reprezentativa. Este evento era mi dover i kreygo ke ya parvine. El rav Nafi Haleva dyo a entender las leyes de una boda relijyoza i el rav Natan Siliki kon su boz ermoza antusyazmo a los envitados.
El diya iva eskapar kon un konser i despues ivamos a komemorar el 19en anyo de los ke muryeron en un atako de terorizmo en el anyo 2003 ma malorozamente, ke koensidensya tomimos haber ke en Taksim uvo un atako similar de terorizmo. Tornimos a kaza un poko tristes ma yo yene va ogurar para kada anyo ke mos ayege el Dyo kon sanedad i repozo bueno.
