En una asamblea a la kual reprezentantes de munchas komunidades judias asistieron, el eskritor remarko ke todos eran muy diferentes de unos a los otros. Ombres vistidos kon robas tradisionales ultra ortodoksos, mujeres modernas, ekstrem liberales, mansevos profesionales en sus vente anyos, retirados en sus sesenta anyos.
Komo pueden estas personas tan diferentes komo forma de vida, anyos, i opiniones, unirsen en una sola boz en el mundo entero, ‘la boz de los judios’?
La istoria de los judios empeso kon los dodje trivos muy diferentes ke desharon Ejipto, i formaron una aliansa kon el Dio en el monte Sinai.
La tradision de los judios siempre fue la tradision de un solo Dio, mezmo ke uvo diversas opiniones sovre lo ke este Dio kijo dizir.
La unidad judia es bazada en la lejitimidad de diskusiones, i de diferensias ke es la fondasion de muestro puevlo: muestra kapasidad de estar dakordo, o de pueder eksplikar al otro ande no esta dakordo.
El eskritor esta kontando una istoria en su artikolo.
Un rey biviya en armonia kon los abitantes lokales. Un diya, su konsejero lo konvensio i le disho ke en un imperio no deve de aver diferensias entre la djente. I ansi, lo konvensio a forsarlos a konvertirsen a la relijion del estado.
Un diya, un fabrikante de tapetes le trusho dos tapetes i le disho de eskojer el ke le va plazer.
El primer tapet era de kolor kolorada i kon muy ermozas figures enriva; uno de los mas ermozos tapetes ke el rey aviya visto fin akel diya.
El rey fue empresionado de esta ovra ma su kuriozidad por ver el otro tapet fue mas grande.
El sigundo tapet estava brodado kon kolores diferentes, kon diversas figuras delikadas, i kon munchos detalyos. Los ilos utilizados eran de oro, de plata i de kovre. El tapet estava komo una ovra de arte, empresionante en su ermozura, i muncho mas ermozo del primer tapet.
Furiozo el rey le disho, ‘Ya savias ke iva eskojer el sigundo tapet. Deke me amostrates el primer?’
El vendedor le respondio, ‘Sinyor Rey, el sigundo tapet es su reynado riko de diversidad. El primer tapet es lo ke su reynado va ser si oye las palavras de su konsejero. Todo lo ke es espesial, todo lo ke es diferente, todo lo ke lo aze uniko a su estado, va despareser’.
Al diya el rey anulo la desizion ke el konsejero le aviya rekomendado.
La ermozura del puevlo judio es komo este tapet. En este tapet, los ilos de diferentes kolores, i de diferentes materyales se ataron unos kon los otros, i una ovra de arte salyo en medio.
La kapasidad de reunir los miembros de las komunidades judias del mundo, mezmo siendo tanto diferentes, pueder partisipar en un dialogo sin violensia; esto es la ermozura de la unidad judia.
Viendo los konfliktos entre los shiis i los sunniis, entre el Fatah i Hamas ke son ermanos, puedemos entender komo de presiozo es el dialogo entre los judios.
Muestra tradision de dialogo, i de diskusion es muy poderoza. Esta unidad ke mos viene de muestra diversidad, es muestro orgolio. Muestra abilidad de ser respektuozos unos a los otros, es la baz de muestra tradision, i de la edukasion judia. Esto es el sekreto de la unidad del puevlo judio.
