Un amigo ke es doktor mos konto en facebook ke su madre de 89 anyos deviya de ser vaksinada por la tresera vez, ma komo no estava puedyendo salir de kaza, se adresaron a las otoridades medikalas para ke vengan a vaksinarla en su morada.
El diya de Alhad proksimo, sono el telefon i kon una boz muy kalma i janti se prezento el del telefon dizyendo ke el es el doktor del Departamento de Salud i ke tiene muncha pena de dizirles ke las infirmieras estando muy okupadas, no pudyeron fina agora akumplir sus doveres enverso la mujer aedada, i ke el aviya desidado de profitar ke era Alhad para vinir el mizmo para la enjeksiyon.
La avla estava muy respektuoza komo la ke yamamos “İstanbul efendisi”.
Muestro amigo kontinuando de avlar mos disho ke el fue tan empresyonado por la jantiyes i el entereso del doktor, ke despues ke serro el telefon pasaron unos dos tres puntos para ke se venga en si, pensando ke malgrado todo en muestros diyas ya egziste dainda este modo de personas buenas, konsensyozas enverso sus entornos.
No savesh el plazer ke tuvo la persona del telefon kuando le disho muestro amigo ke i el tanbien es doktor i tiene el mizmo nombre, kontinuo en yamandolo su “kolega”, ke el iva tener un komporto similar enverso kualkera persona.
En ambezandomos este kavzo, mi marido i yo estuvimos muy kontentes i mos se alevanto el moral. Ma ke desepsyon tuvimos un diya despues en meldando en la tresera oja del jurnal ke un grupo de 5 a 6 personas firyeron en un espital a un doktor por la sola razon ke uno de estos tuvo dolor en lo ke le estavan dando sangre. Meldimos despues ke el ministeryo desido de tomar mezuras fuertes. Vamos a ver, ma no esto muy sigura ke va aprovechar enverso estas personas salvajes.
Arogaremos de no rankontrarmos nunka kon djente salvaje komo estas i ke el Kriyador protejga a todos los paramedikos ke estan penando i lazdrando para salvar vidas, sovre todo en los diyas de la pandemiya.
