Ke es la vida sin internet?

Karel VALANSİ Judeo-Espanyol
2 Kasım 2022 Çarşamba

Puedesh enkontrar un monton de artikolos sovre komo el internet afekta i troka muestras vidas. Ay munchos tambien sovre los danyos del internet i ke es veramente una adiksyon. Dado ke a las kreaturas se les prezentan las tabletas o los telefonos intelijentes desde una edad temprana, tambien se analiza komo estos dispositivos se konvirtieron en una parte indispensable de su edukasyon.

Al entender ke yo solo teniya komputadora en la eskola segundarya i un telefono movil en la universidad, i ke la vida puede egzistir sin internet, mi ijo se sorprende tanto komo al saver ke su abuelo teniya un ‘tel dolap’ en lugar de un frijider, i ke su abuela dava los tifsines al orno de la izla Büyükada para azer borekitas.

Las reuniones familiales no son diferente al ke se repite en munchos de muestras kazas. Todo el mundo tiene un telefono movil en la mano i bive en un universo paralelo en el entorno virtual. Bueno ke la prohibision de djugetes en la meza tambien se aplika a los adultos.

Si esta kondisyon se yamó adiksyon, yo lo sufro. No tengo una repuesta klara a la pregunta de kuantas vezes al diya revizo mi kuenta de Twitter, aparte de "munchas". Tambien revizo mis e-mailes munchas vezes. Topi una solusyon. Desaktiví las notifikasiones. Asina uzo estas aplikasyones kuando yo kero. Pero, de alguna manera los revizo kada 15-20 minutos i en realidad no nesesito resivir notifikasiones! Triste pero sierto. Me demando ké esta pasando en el mundo virtual. Ke no salte una notisya en Twitter, ke no me kede atras de diskusiyones i programas de reuniones en Whatsapp.

Tomí prekosyones munchas vezes. Por ejemplo kuando lavoro, meto el telefono en silensio i lo desho en la kamareta leshos de mi. Pero esta vez, topo un milion de mesajes i yamadas, prinsipalmente de mi madre. Una vez en vakansas provi una desintoksasyon de internet para siete dias. Pero al final me rekompensi merkando una koneksyon de internet i una enorme barra de chokolate. Internet es importante pero devemos tomar prekosyones para no tener una adiksyon.

Siz de yorumunuzu yapın

Tüm Yorumları Görün