Kipa por el prens
En 2013, Charles asistio a la seremonia en la kuala el rabino Efraim Mervis fue nominado grande rabino de Ingleteria. Era la primera vez ke un miembro de la famiya royal asistio a una seremonia de este tipo. En la seremonia, le izieron regalo una kipa espesial, konforme al Prens de Gales, kuzida kon ilo de oro enriva de velur de kolor blu.
Relasion entima kon el viejo Grande Rabino
Charles teniya una relasion muy entima kon el viejo Grande Rabino,
Jonathan Sacks. El prens dio un diskorso emosyonante sovre el, en sus funerayes en 2020.
Fotos de siete sovrebivientes del Olokosto en el Palasio de Buckingham
Charles ensistio ke se adjuste fotos de siete sovrebivientes del Olokosto a la Koleksion de fotos en el Palasio de Buckingham. La razon de este projekto fue para asegurar ke las futuras jenerasiones en el paiz nunka se olviden las atrosidades del Olokosto.
Kada Shabat los judios orasionan por el bienestado de la monarkia
Kada semana desde 1801, los judios del Commonwealth rogan por el bienestado de la monarkia en las sinagogas. En el mundo entero, egziste una tradision de judios ke orasyonan de esta manera por los soveranos de sus paizes.
En la fiesta de Hanuka selebrada en el Palasio de Buckingham en 2019, Charles remersio a la komunidad judia britanika por sus orasiones i disho: "Vos felisitamos la fiesta de Hanuka mientras ke rogash por el bienestado de la monarkia kada semana".
Le izieron berit milla kuando nasio
Kuando Charles nasio, el rabino Jacob Snowman ke era mediko i moel, le izo la berit milla. Esta tradision empeso en la epoka del rey Jorge I, ke reino en el diziochen siglo. La reina Isabel tambien le dio esta mision al rabino Snowman ke era el moel el mas konosido de Londra.
La prenseza Alicia (nona de Charles) resivio el titolo de Djusta entre las Nasiones
La prenseza Alicia, la inyeta la mas manseva de la reina Victoria, se enstalo en Atenas kuando se kazo kon el prens Andrés de Gresia. La prenseza Alicia eskondio del Gestapo sus vizinos judios. La prenseza Alicia resivio el titolo de Djusta entre las Nasiones por la parte del Muzeo del Jenosidio de Yad Vashem, i sus guesos fueron yevados al Monte de los Olivos vente anyos despues de su muerte en 1969, segun su testamento. En 2016, Charles vijito la tomba de su nona kon rozas ke aviya traido de Eskosia.
Vijita a Israel
La reina Elisabeth nunka vijito Israel, mezmo ke vijito 129 paizes diferentes. El Ministerio de Relasiones Eksteriores britaniko prohibio la famiya royal de vijitar ofisialmente Israel. La vijita de 1994 del marido de Elisabeth, Philip, al simeterio de su madre, la prenseza Alicia, en Yerushalayim, no era una vijita ofisial. La primera vijita ofisial a Israel en 2018 fue la vijita del ijo grande de Charles, el prens William, ke asistio a las selebrasiones del 70en aniversario del paiz. El prens Charles viajo a Israel para el funeray de Yitshak Rabin en 1994 i Shimon Peres en 2016. En 2000, Charles viajo a Israel kon el titolo ofisial por la primera vez para reprezentar la Grande Bretanya en el Forum Mondial del Olokosto en Yerushalayim, komo parte del 75en aniversario de la liberasion de Auschwitz.
