Los eskrivanos de la gazeta Şalom mos glorifikaron kon sus livros. En los diyas pasados, los eskrivanos del Şalom, uno despues del otro publikaron sus livros de diferentes kazas de publikasion. Los livros se reunyeron kon sus lektores i tomaron buenos komentarios de todas las partes.
Los arrekojimyentos de kultura i de eskrituras de los eskrivanos mos pasaron a mozos, a los lektores kon muncha reushidad. Los lektores tomaron plazer de meldar kozikas ke kontyenen aryento umanita, kultura, sivdad, talmud, kultura sefaradi i ashkenazi, istorya…
En los tyempos dalkavo, la direktora de la publikasyon Şalom Dergi, Suzan Nana Tarablus publiko su kuatren livro “Padre! Deke mos estan yamando konvertso?” (Baba Bize Neden Dönme Diyorlar). Este livro se imprimo por la kaza de publikasion, Varlık i es un lavoro de las impresyones de los miembros de la komunidad sabetaista.
Yakup Barokas, el direktor pasado de la gazeta Şalom, publiko su segundo livro, La Isla Buyukada, de mi Chikes (1951 – 1971) (Çocukluğumun Büyükada’sı 1951-1971). Este livro se imprimo por Adalı. Yakup Barokas en este lavoro mos konta las memoryas de su chikez i su manseves, sovre un periodo ke paso aryento de 1951-1971.
İzel Rozental, el karikaturisto del Şalom “Tünelin Ucu” publiko su livro muevo despues del “F”. “B” umoristikos, i “La Moda, mi Amante” (Moda Sevgilim) memoryas de los abitantes de la sivdad Moda, publiko el livro “Los Granikos de Adolesensya” (Ergenlik Sivilceleri). Los eroes de este livro Miju i Jojo mos yevan al periodo de adolesensya kon un umor intelijente. Tambien mos desha una sonriza en muestras karas inkreivle.
Moris Levi, el kolavorador i el ko-direktor pasado del Şalom, agora eskrive en el Şalom Dergi, publiko su livro “Novya kon su setenta velos” (Yetmiş Duvaklı Gelin). El mos konta konsejikas sovre las perashas ke dan a la persona pensamyentos umanos. El mos dize: kada shabat es una novya ke vyene a kaza. Miles de anyos se meldan las mizmas perashas ma los sentimyentos i las lesones mos dan diferentes impresyones. Este livro esta dekorado kon las fotografias de Amy Emel Banbasat muy valutozas. El livro se publiko por Gözlem Gazetecilik Basın Yayın A.Ş.
Sibel Cuniman Pinto tambien es kolavoradora de los eskrivanos del Şalom sovre la kultura de komidas. Es tambien una aktivista sovre “zero chopes” en la kozina. Es editora del www. kashkarikas.com. En su lavoro de alkavo, en un proyekto de la komunita kon 129 mujeres djudias del mundo entero ke tyenen lavoro, publikaron el livro “Feeding Women of the Talmud”. Este livro kontiene kuentos sovre sesenta i mueve mujeres ke pasan en el Talmud i glorifikaron a eyas kon las komidas veganes i kon pensamyentos valorozos.
Komo eskrivi en mi eskritura, semos orgulyozos de sintir estas reushidades de muestros kolavoradores. Los livros de Nana S. Tarablus, Y. Barokas, İ. Rozental i M. Levi se pueden merkar del Şalom (www.gozlem.com.tr) i el livro de Sibel C. Pinto del www.amazon.com
