Oy vos kero kontar la istorya de un vapor... Ma, la istorya de este vapor no es un kuento ke se va eskapar en diez o kinze puntos, sino la istorya del nasimyento de la vida djudia en la Amerika del Norte, de los Djudios de los Estados Unidos.
Es bien savido ke los primeros kolones djudios en Nueva Amsterdam (la koloniya olandeza ke un syerto tyempo despues se yamo Nueva York / New York) no fueron resividos kon una profunda animozidad de la parte del governador, Peter Stuyvesant. Si bien ke munchos kolones yegaron al muevo mundo en la bushkidad de libertad relijyoza, estos 23 ombres, mujeres i kriyaturas djudios, en realidad yegaron a la Amerika del Norte por azardo, aksidentalmente!
Estos Djudios sefaradis estavan fuyendo de la konkista portugeza de Recife (Brasil), una sivdad sud amerikana ke aviya estado debasho el kontrol de los olandezos (los olandezos permityeron ke los Djudios bivyeran avyertamente komo Djudios). Solo podemos imajinar el espanto i oror kuando Portugal kapturo el teritoryo!
Kon el espanto de la Enkizisyon, los Djudios abordaron uno de los 16 vapores ke los portugezos aseguraron a todos ke keriyan abandonar el teritoryo. Malorozamente, el barko no pudo yegar nunka a su destino, los Paizes Bashos, la Olanda. Despues ke el vapor fue atakado en la mar, los 23 Djudios fueron yevados a Nueva Ámsterdam el 7 de Septembre de 1654 a bordo de un vapor fransez.
Las intensyones del kapitan fransez estavan leshos de ser altruistas. El Kapitan Jacques de la Motte imediatamente demando a los refujiados pagamyento por el viaje i demando al djuzgo lokal de ser pagado (savyendo ke aviyan peryido la grande parte de sus posesyones durante el atako en la mar). Dos myembros de la komunidad fueron detenidos asta ke pudyeron arrekojer la moneda para el pagamyento (demandando ayudo de sus korelijyonaryos en Amsterdam).
Peter Stuyvesant no keriya muncho byen a los Djudios (se puede dizir del todo al lugar de no muncho! Kuando era governador de Curazao, bushko a defender la imigrasyon Djudia i por empesar defendyo ke los los Djudios tuvyeran esklavos), i empleyo el estado dezesperado de estos refujyados para demandar a los patrones dirijentes de la koloniya (Kompaniya Olandeza de las Indias Oryantales - Dutch East India Company) de impedir ke los Djudios sean una karga para el governo i ke deviyan ser arrondjados. Su demanda fue refuzado i Stuyvesant fue ovligado de permeter a los Djudios de instalarsen en New Amsterdam. I ansi empeso la komunidad djudia de Nueva York.
Si demandash para kualo eskrivi esta istorya: si bien ke la sivdad de Nueva York tyene oy la mas alta konsantrasyon de Djudios en el mundo (despues de Israel) devemos de akodrarmos del empesijo modesto de un grupo de 23 ombres, mujeres i kriyaturas ke yegaron a Nueva York el 7 de Septembre de 1654, i ke es este mez el 368en aniversaryo de este evento.
