Mahsa Amini, nasyo en 2000 en la parte Kurda de Iran, yamada Sakkız. El diya de 13 Septiembre, viyajava kon su famiya a Tahran. Eya fue arestada i torturada por no uzar su “hijab” korektamente, por la “Polisiya de la Moral del Governo Irani”. Esta polisiya es kargada de kontrolar el komporto relijiozo islamiko en la sosyedad.
Despues de dos oras de golpes a la kavesa i torturas, sufriyo un atake serebral i kardiako i entro en koma. I malorozamente muryo despues de dos diyas. Esto es una agresyon i violensya kontra las mujeres en Iran. Mahsa estava kon su ermano kuando la polisiya la yevo. El ermano, Kiaresh protesto. Le disheron ke la van a liberar en una ora, ma la yevaron al ospital Kasra, kon ambulans. La polisiya disho ke en lo ke la arestaron, eya paso una kriza de korason i esto le kavzo la muerte. Ma los aktivistos disheron ke teniya roturas en los guesos de la kavesa.
Sovre este haber la djente empeso a revoltarse. Los mansevos de las universidades i kaje en todas las partes de Iran empesaron a romper los djames de los otomobiles, kemaron los konteyners de los chopes. La Polisiya empleyo bombas de lagrimas. Firieron los ke estavan gritando en las kayes kon palos i djopes.
Las mujeres se kortaron los kaveyos i kemaron los shales de sus kavesas para protestar este kavzo. Kemaron las bandieras, echaron piedras ensima la polisiya. En estas demonstrasyones 250 personas fueron arestados, 75 firridos i 5 personas muryeron.
Sigun la deklarasyon del “Alto Konsilyo de Derechos Umanos de las Nasyones Unidas”, se va avrir una investigasyon para la tortura ke le izieron a la povereta Mahsa. Esta organizasyon egzijo ke todas las personas i funksyonaryos responsavles en este kavzo deven ser yevados delantre la justisya i deven ser investigadas penalmente.
Un jurnalisto fransez disho: De aki en delantre, el koraje tiene un nombre: Las mujeres iranianas.
Lo ke se esta pasando aya es muy fuerte. Los insidentes estan mas muncho en el Kurdistan Irani.
Las mujeres ke estavan manifestando teniyan un slogan: MUJERES, VIDA I LIBERTAD
De otra parte la famoza jurnalista amerikana Christian Amanpour kijo azer un reportaje en CNN sovre este kavzo kon Reisi, el Prezidente de la Republika Irani. Despues ke se aparejaron semana entera en el studio, komo luzes, boz i ocho oras de traduksyon, asperaron i asperaron i Reisi no estava aparesyendo. 40 puntos despues vino un konsejero i le disho a Amanpour ke deve de taparse la kavesa por modo ke ya entraron en el mez de Muharrem i Safer. Amanpour no aksepto i disho ke eya esta biviendo en un payiz ande no es obligatoryo de meter un shal ensima la kavesa. El konsejero respondyo ke en este kavzo no sera posivle de azer este reportaje porke eya ansina esta tomando parte de los revolusyonaryos.
+++++++
Esperando ke no ayga mas pletos i gerras en el mundo, ansi ke las mujeres tengan sus derechos i no seyan mas matadas, vos auguro una buena anyada mueva i dulse. TIZKU LE SHANIM RABOT.
