Ke kere dizir Roshashana? Por siguro ke todos ya savemos ke rosh es kavesa i shana es anyo en ivrit. Ma ke sinyifika este byervo? Sigun el kalendaryo ebreo, los dos primeros dias de el mez de tishri son los dias de djuzgo, dias de asoplar 100 vezes el shofar, de tirar los pekados i de arepretimyento de los yerros ke izimos entre el anyo.
Ir a la keila, kreer en Dyo, orasyonar, oyir el shofar; todo es muy ermozo ma lo mas ermozo es las kustumbres ke tenemos.
Un djudyo, seya relijyozo u no nunka no fuye de las tradisyones. Sovre todo, noche de roshashana todos tyenen en sus mezas mansana, miel, kavesa de kodrero u de peshkado i por siguro koftikas de prasa. Munchas mujeres, no seya ke no kede, ya empesaron a eskaldar las prasas de un mez antes. ken i ken va egzajerar kuantos kilos eskaldo:
“Yo ya eskaldi 7 kilos!”
“7 kilos ??? A ken abasta; yo tengo 25 personas a komer andjak 12 kilos; ya esto bolada!”
Bueno ke no so vizina de esta damma ke eskaldo 12 kilos de prasa, porke la golor no es muy famoza ma el komer no ay presyo.
Ayer demanyana me alevanti ke me va ir a ver a mi inyeto. Tomi el kafe ke uzo, me visti, el tyempo esta maraviya; desidi de yevarlo a kaminar. Sali a kamino, apenas paso 5 puntos empesa una luvya se estan avyendo los syelos. Asperando el otobus, dyeron anunsio ke el otobus se bozdeo en el kamino, manko de una ora no puede vinir otro. Pensi, kon esta luvya tomare un taksi; ande, ni un taksi no ay por semejansa, todos yenos, no me estan tomando. Alora dishe, tomare la araba, torni a kaza, avri la chanta, komo no iva tomar araba no tomi la yave. Suvi a kaza, avri la chanta bushko bushho; kon el telash ke sali, me olvidi de tomar la yave de kaza. Abashi ande la vizina ke tyene mi yave, sono sono, no ay dingunos. De muevo sali a kamino zar zor ya topi un taksi, me suvi, el shofor empeso a gritar ke le moji los koltukes, de vista ke abashe. Le arogi, mi ermuera lavora, mi inyeto va kedar soliko, kualo ay yevame. Neyse ya vine ande mi ijo aryento las aguas, avri la chanta, paras no tomi. Le dishe aspera un punto tomare de mi ermuera te pago, ke veyo mi ermuera apenas me vido, kon adjile se suvyo a la araba i se fue. En diskutyendo kon el shofor veyo ke mi inyeto se esta abokando por la ventana, ya se va kayer. Por aki el shofor me esta maltratando, por aya mi inyeto se esta abokando, ya se va kayer, kero gritar no me esta salyendo la boz.
En eskaldando la prasa, me kedi durmyendo en la kanape. M'esperti aryento la sudor. Bendicho el Dyo era un mal eshuenyo ke vide, todo lo kulpa la prasa, ma yo dia entero estuve kon la enfluensa de este koshmar malo.
Seyamos todos eskritos en livros de vida kon sanedad, kon azlaha, kon pas i amor, en el mundo i en el paiz, amen.
SHANA TOVA U METUKA.
