Muestra ley santa fue dada en el dizyerto kuando dainda Israel era un puevlo sin tierra, errando 40 anyos despues de su salidura de Ayifto. Oy mizmo mos enkantamos de ver la presizyon kaje moderna i puede ser mas de las leyes dadas por Moshe sovre el orden divino. Moshe ke no ayego a entrar i ver la Tierra Santa prometida a su puevlo por el Sinyor del Mundo.
Oy avlaremos partikularmente de la ley de las sivdades de refujio para el ke kavza la muerte de una persona kontra su voluntad, un aksidente malgrado el, sin kerer. Esta ley mos desha verdadmente enkantados. 6 sivdades serviyan de refujio al ke kavza muerte sin kerer i ke esta en perikolo de la vengansa de los serkanos de la famiya del defundo. Este pekador va estar en un modo de Galut en una sivdad leshos de su famiya i keridos, asperando el djuzgamiento. El tiempo de su galut era fiksado asta la muerte del Kohen Agadol de su epoka. Esta ley de djustisya umana era una verdadera inovasyon en el mundo de la antikidad.
Kale avlar tanbien de las 42 sivdades de los Leviim, ke eran verdaderos sentros de edukasyon i sensya. Las sivdades de los Leviim eran espartidas entre los trivios de Israel, ma el punto enteresante, spesialmente es la asemejansa ke izieron unos de muestros savios de esta ley de refujyo, kon la Shema Israel. La Shema es una tefila ande mos refujiamos en ora de sar, espanto, apreto i sufriyensa. Echamos el grito “Shema Israel” verso el sielo.
Si se aze atansyon se ve ke los primeros biervos de la Shema son 6, “Shema Israel Ad.nay Eloenu Ad.nay Ehad”, komo las 6 sivdades de refujio. El primer paragrafo de la Shema tiene 42 biervos komo las sivdades de los Leviim.
Kereras al Dio de toda tu alma… Las rekomendasyones ke te dyo… Las ataras a tu braso… Entre tus ojos (tefilin)… En tus puertas (mezuzot)…
La Shema es refujio spiritual en toda ora de muestra vida. Ley de djustisya i amor, ke santa es tu fuersa i tu poder ke mos ayudas siempre a kaminar en tu kamino de verdad i de djustisya.
Amen.
