A munchas personas les parese ke bivir en kazales, aze bien para muestra salud mentala. Por esto preferan deshar las sivdades i ir a bivir en los kazales. Un estudio ke fue echo en estos tiempos dalkavos, mos disho ke mos yerramos, ke bivir en la sivdad no mos danya fizikamente o mentalmente, mos da fuersa para gerreyar kon las difikultades de la vida.
El Profesor G. Friedman, psikologo de Kanada izo un estudio i topo ke los ke biven en la sivdad, biven muncho mas largo ke los ke biven en los kazales, i la muerte de las kriyaturikas chikas son mas mankas en la sivdad. Es verdad dize el profesor, ke el aver suzyo, el bruido, la tension, la muncha djente no es bueno del todo para la salud, ma malgrado esto, en la sivdad los tratamientos medikos son muncho mas mijor ke en los kazales. Los servisios de las munisipalidades son mas mijores, ke esto sierve ke los moradores bivan una vida mas konfortables.
En los estudios muevos de salud mental ke izieron en Manhattan, toparon ke la situasyon esta mas negra en los kazales chikos del entorno. Alora se demandaron: Komo puede ser ke malgrado ke ay mas munchas difikultades en las sivdades, ay mas pokos kavzos mentales.
La primera repuesta es ke los problemes mentales no vienen de las presiones del entorno, ma de los resultados de las firridas profundas. Hazinuras mentales, genetikas, komunikasyones malas entre los paryentes i los ijos, i el stres ke kavza ke las personas no pueden satisfazer sus nesesidades personales. Yevamos kon mozotros muestros problemes a los lugares ke mos vamos. La vida en la sivdad mueva mos plaze al empesijo, ma despues, muestros problemes salen de muevo en medyo. Esto no kere dizir ke kavza hazinuras mentales siguro.
Un psikologo amerikano dize ke la persona kale ke se ambeze a bivir kon sus problemes. La muncha kantidad de las personas, el bruido, la alta tensyon, kavza mankura de komunikasyon i inyervozidad. I ésto siguro puede bozdeyar el ekilibro mental. Ma el Prof. Friedman dize ke estas kozas no bozdeyan direktamente el ekilibro mental, ma ayuda a bozdeyarla, si ay algun defekto. Los psikologes dizen ke la vida en la sivdad, el bruido, el telash, la djentoria, kavzan tansyon alta, mankura de kontakto i mankura de komunikasyon i siguro inyervozita. Ma a la kontra, el Prof. Friedman dize ke estas difikultades no kavzan defektos mentales si la persona bive en una ambians kalma i oroza. Tanbien mos da un egzemplo. Si una persona ama la muzika, mizmo si esta el volumen alto, no la deranja. Ma si una persona no ama la muzika, si esta el volumen alto, va sufriyir. Mas de esto, las personas ke reushen a bivir kon las difikultades de la sivdad, tanbien reushen a tomar plazer de los avantajes de la sivdad. Por esto munchas sosyetades de konstruksyones, ampesaron a azer kazas aryetro de la sivdad ma kon konteksto de kazal. El slogan suyos es: “Bivir en la sivdad, komo afuera de la sivdad”.
