El diya 27 de Julio, del anyo 1656, fue el diya ke tomaron la desizyon de ekskomunikar, de darle el Herem al joven Baruch por sus ideas ke no korespondiyan kon su komunidad Djudiya Sefaradi de Amsterdam. Una komunidad de Djudyos ekspulsados de Portugal por la enkizisyon Kristyana, i establesida en Olanda savyendo ke ivan a tener la libertad de pratikar la relijyon djudiya sin espanto. Akel tiempo Baruch teniya 24 anyos i el dekreto del Herem dize ke:
“Los senyores de esta komunidad azen saver ke desde muncho tiempo vyendo las opiniones yerradas i el komportamyento de Baruch de Espinoza, intentaron kon munchas promesas de azerlo ezvacheyar de su kamino mallogrado. Después de no ver algún resultado i tener enformasyon ke kada diya esta pratikando sus ororozos pensamientos, desidyeron ke este mismo Espinoza devriya de resivir el Herem.
Después del djuzgo de los andjeles i de los Santos, estamos anatemizando, arrondjando, maldizyendo el maldicho Baruch de Espinoza, kon el konsentimyento del Dyo Baruh U, i de la Kongregasyon Santa, delantre de estos Livros Santos i los sheshentos i tredje mitzvot. Ke seya maldicho de diya, de noche, al despertarse, al echarse, en la kaye, i en kaza. El Dyo no lo va pardonar, su ravya i su kolera ke seyan kontra el. El Dyo va destruir su nombre debasho de los syelos. Dingunos no van a komunikar kon el ni avlando ni eskrivyendo, no le va amostrar dinguna favor, no va kedar kon el debasho del mizmo techo, no se va aserkar de el menos ke dos metros, no va meldar nada eskrito por el”.
En realidad, Spinoza no desho de kreyer en Dyo. Ama por el, Dyo es el Universo. Por esto, los istoryadores lo van a konsiderar komo el primer Djudyo laiko. Kon la iluminasyon i el rasyonalismo del siglo pasado, Spinoza fue konsiderado por los pensadores, komo un martiro. En 1924, en una konferensya ke tuvo lugar por el aniversario de los 250 anyos de su muerte, el istoryador i akademiko Joseph Klausner dize: “A Baruch Spinoza el Djudyo; del Monte Scopus, de este muevo Sanktuaryo ke es la Universita Ebraika de Yerushalayim, Tu Herem esta annulado. Kualker seya tu pekado kontra el Djudaismo, va ser pardonado. Muestro ermano sos, muestro ermano sos, muestro ermano sos”.
En 1953, David Ben Gurion eskrivyo en el jurnal Davar un artikolo kon el titulo, “Atakanaremos la muerte” pensando resusitar los eskritos de Baruch Spinoza en Ivrit: “Es el Dover de kada sivdadano israelí de azer tornar a muestra kultura i lingua Ivrit, los eskritos orijinales del mas profundo filozof ke salyo del puevlo Ivrit en los dalkavo dos mil anyos”
Oy, Dingun estudyo ke se baza sovre la istorya del Pensamyento Djudyo no puede ser konsiderado komo kompleto, sin mensyonar el nombre “Baruch Spinoza, el Filozof de los Filozofes.”
Fuente: La Libreriya Nasyonal de Israel. Chen Malul
