“Esto orgolyozo de ser judio, i es por esto ke me preokupa el antisemitiszmo ke esta pujando de diya en diya” esta dizyendo Steven Spielberg.
Anyos antes, en los diyas del filmo ‘La lista de Schindler’, Spielberg avlo aviertamente sovre sus raizes judias i sovre sus esperansas para sus ijos. Kuando era chiko, la famiya Spielberg bivyeron en California. Eyos eran la sola famiya judia del vizindado.‘Ya saviya siempre ke atirava la atansion por mi judaizmo”, se esta akodrando Spielberg. “En la eskola segondaria me aharvavan. Me deshavan la nariz ariento de sangre. Era orivle”.
Los Spielberg avian pedrido parte de su famiya en el Olokosto, teniyan parientes ke fueron asasinados en Polonya i Ukrania. A la edad de 46 anyos, Spielberg dio un paso korajozo filmando el filmo ‘La lista de Schindler’.
La desizion de realizar el filmo fue en un momento de la vida de Spielberg kuando ser judio estava tomando una emportansa personal en su vida. En este punto, Steven era el padre de sinko kreaturas i el keriya ke fueran engrandesidos kon una fuerte identidad judia.
“Kuando mis ijos nasieron, me desidi ke resivan la edukasion judia”. Su segunda mujer, Kate Capshaw, se konvertio al judaizmo. Poko despues, las puertas de todas las kazas de Spielberg tenian mezuza. Spielberg konstruyo una kuzina kasher en su kaza de Los Angeles, ande su madre gizava las komidas de las fiestas judias.
Steven se esta akodrando komo su madre le avlava del Olokosto kuando era una kreatura. ‘El Olokosto siempre fue parte de mi vida. Las noches, oras de komer su madre i su padre avlavan del Olokosto. "Peryimos primos, tias, tios”.
Oy, Spielberg tiene siete ijos i tres inyetos, i esta diziendo ke filmar ‘La lista de Schindler’ fue el punto ke konfirmi mi judaizmo a mi famiya i a mi mizmo”. Fue en este momento ke la famiya Spielberg empeso a obzervar todas las fiestas judias i asender las kandelas de Shabat, la noche de viernes. Selebraron bar i bat mitzvot para sus ijos. Spielberg los engrandesio kon amor por Israel i una fuerte koneksion a sus raizes judias.
Spielberg konto su apoyo a Israel i su dedikasion a kontinuar la edukasion sovre el Olokosto. “Komo judio, so konsiente de la emportansa ke es la egzistensia de Israel para muestra sovrevivensia. ‘Solo sinko estados ovligan a la edukasion sovre el Olokosto en sus eskolas. Yo va kontinuar a lavorar para ke los programes de edukasion sovre el Olokosto seyan ovligatorios en los 50 estados, i tambien los programes de edukasion sovre la toleransia sean ovligatorio para graduar de la eskola segondaria”.
Spielberg establesio un archivo de videos en la Universidad Ebrea kon miles de oras de entrevistas kon sovrevivientes, yamado Proyekto testimonial del Olokosto.
