LO KE MOS AMBEZAN LAS MEGILOT

Judeo-Espanyol
27 Temmuz 2022 Çarşamba

Silva Filiba

El biervo Megila (Rulo) mos akodra siempre la Reyna Ester i Purim. Ma ya savemos todos, ke ay mas otras 5 Megilot, ke kada una, aparte El Kohelet ke se melda en Sukot semboliza una figura de mujer.

El Shir a Shirim, eskrito por el Rey Shlomo ke se melda en Pesah, es un verdadero poema de amor i de ermozura, prezentando una figura de la novya, la amante….

La Megila de Ruth eskrita por el profeta i djuzgo Shmuel ke se melda en Shavuot amostra la figura de una  madre,  siendo ke eya es la biznona de David Ameleh.

Ester semboliza la espoza, mujer, ke kon su marido mantuvo la prosperidad del Imperyo Persano.

Komo estamos aserkando del 17 Tamuz, ke es el empesijo de las tres semanas de dolyo, asta Tesha Be Av, avlamos de la Megila del Profeta Yermiya ke aviya anonsado la fin de Yerushalayim i del Bet Amigdash. Esta Megila ke se melda en Tesha Be Av mos amostra la figura de una Bivda u de una mujer ke fue infidel a su marido, ke peryo su konfiensa “sola i triste estas asentada yorando tu amor pedrido”.

Komo ya se entiende, estas todas Megilot reprezentan muestro Dio, komo padre, marido u novyo i su mujer. Ke su mujer es el Puevlo de Israel, ke tanto kamina  en la derechedad, es amado i sostenido por el Santo Kriyador i es  kastigado kuando se aleshan del kamino de la Ley i de las Mitzvot. Ma El Santo Bendicho perdona siempre al ke aze teshuva i regreta sus faltas. Esto lo vemos klaramente en las palavras del Profeta Hosea ke avla a su mujer pekadera (siguro al Puevlo de Israel) i le dize estas palavras sembolikas: Ven me espozare kon ti por la eternidad, seras mi novya en la derechedad, la djustisya, kon el amor i la buendad mi espoza en derechedad i ansi konoseras a tu Dio.

Estos tres biervos de espozoryo son prononsados kada demanyana por kada Judio, en metyendo sus Tefilines i entornando su dedo de los tres tornos de la laniera de kuero ke son los anyos de atamiento al Dio Baruhu. Los tres aniyos de espozoryos.

De la eskuredad nasera,

La luz mos aklarara

I Tesha Be Av pasara

A Nahamu mos trayera.

Siz de yorumunuzu yapın

Tüm Yorumları Görün

İLGİLİ HABERLER

İLGİNİZİ ÇEKEBİLİR