Meldi una shaka i intenti de tradusirla al Ladino.
Unos ladrones entran a la banka i gritan: “La para no vos apartenese. Ama para kada uno la vida suya si ke le apartenese”.
Todos en silensyo i avagar avagar se echaron en basho.
Esto se yama: KONSEPTOS PARA TROKAR MENTALIDADES.
Trokar la mentalidad konvansyonal de pensar en el mundo.
En esto una mujer se metyo de una forma provokativa en una de la mezas.
El ladrón le grito: Mujer, esto es un rovo, no violasyon.
Esto se yama: SER PROFESYONAL.
Dar toda la atansyon a lo ke estas espesyalizado de azer.
Después de tomar todas las paras de la banka, el ladrón mansevo ke fue graduado de la Universita kon su MBA (Maestriya de Administrasyon de Echos) disho al otro ladrón vyejo ke ni eskapo la eskola primarya: “Ven kontaremos lo ke mos yevamos”.
El ladrón vyejo le respondyo: "No seyas bovo, esto es muncha para para kontar. Asperamos a los haberes de amanyana para saver kuantas paras perdió la banka.
Esto se yama EKSPERIENSYA.
La eksperiensya es mas emportante ke un papel de una enstitusyon Akademika.
Una vez ke se fueron los ladrones, el direktor de la banka disho de yamar a la Polisiya.
A esto, el shef le respondyo: Un momento, no olvidar los 5 milyones ke mos mankan del mez pasado. Puedemos adjustar a lo ke se yevaron los ladrones.
El direktor le disho: Tyenes Razón.
Esto se yama: DIRIJIR KON STRATEJIA
Aprovechar de una situasyon ke no era favorable.
Yene los ladrones kontaron la para ke rovaron i les salyo 20 milyones, ama al otro diya los haberes estavan dizyendo ke rovaron 100 milyones.
A oyir estos haberes, los ladrones empesaron a pensar:
Mos atrevimos muestra vida por 20 milyones, mientras ke los dirijentes de la banka se rovaron 80 milyones.
Por lo visto, konvyene mas estudiar i konoser el sistem de lo ke se pasa, ke ser un ladrón.
Esto se yama: EL KONOSIMYENTO ES TAN VALOROZO KOMO EL ORO.
El direktor de la banka se sintyo muy orozo de ver su perdidad en la Borsa ke fue solusyonada por el rovo.
Esto se yama: APROVECHAR DE LAS KONDISYONES
La moral de esta istorya:
Dale una arma a un ombre, i puedra rovar una banka.
Dale konosimyento a un ombre, i puedra konkistar el mundo.
Korreksyon:
El artikulo sovre “EL SAKRIFISYO” ke salyo en el numero de alkavo del “Şalom”, la palavra “ONA” ke kere dizir “SAISON”, “SEASON”, “MEVSIM” fue imprimido por error, "ZONA” ke kere dizir “PROSTITUTA”.
La palabra “ONA” vyene del Ivrit ama i el Ladino tanbyen lo empleyo komo suyo. Así yo lo oyiya de mis padres.
